Charter Document - 04060241

Allen die disen brief sehend ald horrend lesen kvnden wir vro Elisabeth greuene von Honberg vnd vrovwe von Rapreswile de wir mit vnsers herren vnd wirtes hand grauen Lvdewiges von Honberg vnd vnser kinden Wernhers Cyliun vnd Annen willechliche offenliche vnd vriliche vnd mit gemeinem rate Heinrich Abdorf vnserem wirte der burger ze Zvrich ist vnd sinen erben vnser wingarten die vnser eigen waren der wingarten einer lid ze Herdiberg vnd stozet an vnser vrovwen wingarten von Oetenbach so ligend zwene ze Heslibach der einen bvt Heinrich der Wider vnd gibet von des selben wingarten vsgelende zwen mvt kernen ze zinse den anderen bvt der Sideler vnd Berchtold Kegli von Heslibach der vierde lid ze Witellinchon den bvwend die hoflvte von Zollinchon die selben hoflvte die gebend von dien acheren die siv bvwend ze Witellinchon ierlich ze zinse dri mvt kernen die vorgenanden wingarten vnd dv gvot als da vorgeschriben stat han wir gegeben fvr lidig eigen dem vorgenandem Heinrich Abdorf vnd sinen erben vmbe hvndert march silbers Zvricher geloetes vnd sin des silbers gewert allechliche vnd han ovch dc silber an vnseren nuz geleit vnd bekert Ovch svn wir dv vorgenande greuene vnd vnser her graf Lvdewig vnd vnser kind dv wir iezand samend haben oder noch gewinnen Heinriches Abdorf vnd siner erben der vorgenanden wingarten vnd gveteren wer sin fvr lidig eigen an allen stetten Vnd dc Heinrich Abdorf vnd sin erben bewart sin an allen dingen vnd dir kovf stet belibe so gebin wir Heinrich vnd sinen erben disen brief besigelten mit vnseren ingesigelen ze einem steten vnd ewigen vrchvnde Ovch sol man wissen dc vnser kind genveget vnser ingesigelen wan siv eigene nicht hand vnd veriehend des an disem brieue offenliche Diz beschach do von gottes gebvrte waren zwelfhvndert sechs vnd achzeg iar an der mitchen vor vnser vrovwen liechtmes vf der burg ze der Nvwen Rapreswile do indict wc XIIII Bi disem kovfe vnd bi dir gift waren ze gegen her Johans von Elwile ein priester meister Volr der lvpriester von Walde her Rvodolf her Heinrich vnd her Burchart an dem Tvrne gebrvodere rittere her Heinrich der Marchschalch her Jacob von Rambach der schultheiz Volrich von Rvti Gotfrid von Bvobendorf Chvonrat der voget von Honberg Heinrich von Ebnoede Heinrich der amman von Rapreswile meister Volrich der amman von Grifenberg vnd ander erber lvte genvoge die zvo disem kovfe gelat vnd gebetten wurden Ovch sol man wissen dc dir kovf mit grauen Hermans willen vnd rate an den wir disen kovf gesezt hatten beschehen ist