Charter Document - 04060218

In gottis namen amen So sie kunt allen dien die disen brief lesen alde horen lesen daz herre Balbreht von Anwilllle het ze kovfenne gegen dem spitale ze sant Gallen vmbe aine vnde driseg marche silbirs mit siz bruder gunst herrin Egilolffis von Tivnrthon den Odinhof livte vnde gut der da waz dez vor genandin herrin Balbrehtis brudir tohtiron herrin Rvodolffis saligen von Tivnrthon Vnde het der vor genande herre Balbreht gisworn ze den hailigon daz er dem spitale livte vnde gut ledich vnde lere machege swenne der vor genandon tohtiron hern Rvodolffis saligin von Tivnrthon div iungeste tohtir wirt vierzehin iar alt Vnde son die tohtira alle varn ze mime herrin dim abte von sant Gallin vnde son ime abir vf gen livte vnde gut mit allem rehte Vnde sol herre Balbreht Rvodolffin ledigon swa er in ze burgen gisezit het Der vor genande herre Balbreht het ovch gegen sehse gisel vivnwe gesworn herrin Cvonradtin din Schenchen hern Livtoltin din Homin hern Livtoltin von Holinstein Baeldin Schoran vnde Hugin von Celle vnde der sehste ist her Cvonrad dir Homo der het die gisilschaft gelobet mit siner trivwe Vnde swenne der spital dise gisel manot vmbe die virrihtunge livte vnde gutis alse mit wortin an disem briewe beschaidin ist so son siv sich alle antwrtin dir nah an dim ahtodin tage in rehtir gisilschaft iro drie ze sant Gallin herre Cvonrad dir Schenche herre C dir Homo vnde Baeldi Schoran vnde drie ze Bisschofcelle herre Livtolt dir Homo vnde herre Livtolt von Holinstain vnde Hug von Celle der selbe het ovch daz gedingot daz er ain andirn erbaerin man in sin hus lege in rehtir gisilschaft an sine stat Vnde ist daz herre Balbreht stirbit so sol sin brvodir herre Egilolf von Tivnrthon die gisil ledigon vnde dez spitaliz were sin livte vnde gutis dez het er gisworn ze dien hailigon Vnde sol herre Balbreht dem spitale gen ainen brief der swesteron bi dien siz brvodir saligin tohtiron ainiv ist daz div selbe tohtir vnde die swestira livte vnde gutis incigin hain Vnde der selbe brief sol besigelt sin ainwedir mit iro insigel alde mit miz herrin diz abtis insigel Vnde so der spital der swesteron brief het vnde ovch den brief vmbe die virrihtunge livte vnde gutis gisigiltin mit dem insigil dez vor genandin hern Balbrehtis so sol der spital gen cehin marche silbirs dem selbin hern Balbreht mit sis brvodir rate hern Egilolffis von Tivnrthon vnde mit hern Hainrich rate von Lindinberc vnde mit hern Cvonradtis rate diz Homin vnde het der spital tag vmbe daz andir silbir vnze ze sant Gallin tult Vnde swenne denne der tohtiron ainiv ze gaistlichim lebinne kumit alde ainem man wirt gegen wil denne herre Balbreht dez silbirs et so sol er ez dem spitale vor hin sagen zwene manot vnde sol denne dem spitale gen vier gesworne gisel dar vmbe swenne div iungeste tohtir vierzehin iar ald wirt dc denne die drie tohtiran livte vnde gut vf geben mime herrin dim abte dar vmbe dc er ez denne dem spitale lie Vnde sol denne der spital hern Balbreht gen ailivf marche silbirs mit siz brudir rate hern Egilolffis von Tivnrthon vnde mit hern Hainriches rate von Lindinberc vnde hern Cvonradis diz Homin Vnde swenne denne abir ain tohtir ze gaistlichem lebenne kumit alde ainem man wirtt gegen swenne denne herre Balbreht dc silbir vordirot so sol er ez dem spitale vor hin sagen zwene manot vnde sol abir den dem spitale vier gesworne gisel gen dar vmbe swenne div ivngeste tohtir vierzehin iar alt wirt dc sich denne die drie son incien livte vnde gutes alse mit wortin an disem briewe beschaidin ist Vnde swaz hern Hainrichen von Lindinberc dunchit vnde her Cvonradtin din Homin vnde Hainrichin din Blarrer notdurftich ze virrihtun vmbe livte vnde gut dez ist dir herre Balbreht von Anwille gebundin vnde die gisel ze virrihtinne vnde swenne dier tohtiron div iungest vierzehin iar ald wirt dc denne die tohtira alle ze mime herrin dim abte ze sant Gallin koment vnde ime livte vnde gut vf gebent Dar nah son die gisel dem spitale gebundin sin vmbe virrihtunge livton vnde gutis nah rehte drie tage vnde sehs wivcha vnde en iar Vnde alle die gelubde die her Balbreht gelobet het vnde die gisel vmbe virrihtunge livte vnde gutis die het inphangen ammis hern diz abtis stat Hannes dir Spiser vnde herre Vol Lesti vnde an dez spitalis stat herre Hainrich dir Blarrer Diser gisel wrdin vier gegen ze Bischofcelle here Livtolt dir Homo herre Livtolt von Holinstain Baeldi Schoran vnde Hug von Celle da waz zegegine der von Schoninberc herre Cvonrad von Anwille herre Rvodolf von Lindinberc vnde herre Hainrich von Bunishowen dir phaphe vnde der Smit von Hvsen Volrich Alwix dir Weser vnde Rvo von Schonnovwe in dez huse geschach ez ovch Vol von Mvlinon Volki der Nater Wildrich dir tailer Vnde zwene gisel wrdin ze sant Gallin gen dir herre Cvonrad dir Schenche von Landegge vnde herre Cvonr dir Homo da waz zegegine Hannes dir Spiser Volki dir Nater Wernher dir Hunt vnde her Hain dir Blarrer vnde andir livte genvoge Dise kovf beschach ze sant Gallin in deme jare do von gottis geburte waren tusint vnde zwei hundirt vnde ahzich iare darnah imme vierdin jare Wir abt Wilhelm von sant Gallin durd die bette des spitalis vnde hern Balbrehtis von Anwille so henken wir vnse insigil an disen brief ze ainen statin vrkunde allir der dinge div an disem briewe gescriben sint