Charter Document - 04060211
Charter Number: | 04060211 |
---|---|
Cartulary Title: | Chartularium Sangallense IV [St. Gallen] |
Charter Language: | German |
Charter Origin: | Lay |
Charter Type(s): | Sale |
Date: | 1284 |
Date type: | Internal, A.D. |
Resource Link(s): |
Monasterium.net |
Charter:
Allen dien disin brief lesint aldir horint lesin dien si kunt getan dc vro Maht des ammans saligin wirtinne von Abbacella het ze kovffinne gen dem spital ze sant Gallin ir wingartin ze Hasila vnde die Ivte die dar zvo horint vmbe zweinzg march silbirst vnde het si den wingartin vf gen vnde die lvte die dar zvo horint vnde ir brvodir C vnde Her dien er gemachot waz in minis herrin hant des abz von sant Gallin vnde het min herre gelvhin den vor ginandin wingartin vnde die lvte die dar zvo horint Heinrich dem Blarrer ze rehtim lehin vnde div vor genant vro Maht sol iarlich vunf phvnt wider gen den spital vnz dc si zweinzig march dem spital widir git vnde swenne div vor genant vro Maht dem spital nvt git vunf phvnt so sol er sich han vffin dc gvot ze Wille vnde vffin dc gvot ze Watte vnde mag er da nvt gewert werdin so sol er sich han vf den wingartin vnz dc er gewert werde zweinzig march silbirst vnde sol der spital den wingartin vnde die livte die dar zvo horint besizzin mit allim rehte ein iar vnde sehz wucha vnde drie tage vnde dar nah so sol der spital der vor genandvn vro Mahthilt den wingartin vnde die lvte die dar zvo horint lihin zeim rehten lipgeginge vnde sol si dem spital iarlich gen zeiner gehvgde einin sovm wines vssir dem selbin wingartin vnde ist dc vro Maht gelebet dc si dem spital zweinzig march widir git so sol der spital nah ir tode Engiltrvt ir tohtir vnde Annvn ir thohtir thohtir zehin phvnt gen vnde stirpth der vor genandon kint eiz so ist der spital vunf phvnt ledig sterbinz beidiv so ist der spital ledig zehin phvndir vnde sol ovch der spital vro Maht vmbe ir lipgeginge gewisheit gen als hern Vol Lestin spitals halb vnde Cvonr den Magir alden Boler der vrovwin halb vnde brvodir Cvonr den Bredier von Costinze ald brvodir Fridriehin einin gemeinin man zimlich vnde gefvog dvncht an den selbin schitlvten vnde an dem selbin gemeinim man sol ovch stan wc div vor genande vro Maht vnde ir brvodir C vnde Her tvon son ze rithtunge dem spital vmbe alliv div ding div er mit inen geschaffot het Dc dierre brief state vnde geware belibe so hench ich bropst Bertold min ingesigil an disin brief dvr beidir tail bette Diz beschach in dem iare do nach gottiz geburt warin tvsint vnde ewei hvndirt iare vnde ahzig iar dar nah in dem vierdin iare