Charter Document - 04060209

In gottes namen amen Alle die disen brief sehin ald horin lesin de svln dz wissen dz graue Friderich von Thoggenburc grauen Kraftes seligen sun vergihet an disem brieue swz dz gotteshus von Vischinun lvt ald gvot vntz an disen tac in giwalt vnd in giwer her het braht von sinem vather sinen vethirn vnd dar nah allen sinen vordirn dz er dar an enheinis rehtis gihet zihanne noh zi vordrenne an geistlichem noh an welthlichem gerihte vnd gischeh abir dz dz der selbe graue Friderich der hie vor gischriben stat vmb lute ald vmbe gvot als hie vor ginemit ist dz dz goteshus ze Vischinun des tages do dis gischah in giwalt vnd in giwer hatte vor geistlichem ald welthlichem gerihte ane sprechi div ane sprache sol kraft noh maht han noh niemer gewinnen wan er sich es vertzigen hat in die hant abt Hainr von Vischinun der die selben vertzignust enphienc an sines goteshuses stat ze Vischinun Dis sint die getzvge die dz sahin vnd horthon her Burkh der cappillan von Wile her Hvc von Albrehswiller her Vol von Lovwenberc her Hainr von Vurberc Peter a der Egge C der Mechler C der Waldegger Eber der Vinke von Sirnach C Robli vnd dz dis allis dz hie vor geschriben stat deste vester vnd deste steter belibe so henkit graue Friderich von Thoggenburc der hie vor ginemit ist sin insigel an disen brief Dis gischah ze Wile in der stat in hern Hainr Mvndlins hus nah vnsers herrin gebvrte thvsent iar zwei hvndert iar vnd driv vnd ahtzic iar an dem dvrnstage vor sant Thomas thvlt vor wihennaht