Charter Document - 04060208

In gottes namen amen Alle die disen brief sehin ald horin lesin die svln dz wissen dz graue Diethelm von Thoggenburc grauen Kraftes seligen sun vergihet an disem brieue swc dc goteshus von Vischinun lvt ald gvot vntz an disen tac in giwalt vnd in giwer her hat braht von sinem vater sinen vethern wnd dar nah allen sinen vordren dz er dar an enheinis rehtis gihet zihanne noh zi vordirne an geistlichem noh an welthlichem gerihte Vnd gischeh abir dz dz der selbe graue Diethelm der hie vor geschriben stat vmb lvt ald vmb gvot als hie vor ginemmit ist dz dz goteshus zi Vischinun des tages do dis gischah in giwalt vnd in giwer hatte vor geistlichem ald welthlichem gerihte ane spreche div ane sprache sol kraft noh maht han noh niemer gewinnen wan er sich es vertzigen hat in die hant abt Hainr von Vischinun der dise selbin vertzignust enphienc an sines goteshuses stat zi Vischinun Dis sint die getzvge die dz sahin vnd horthon her Burkh de cappellan von Wile her Huc von Albrehswiller her Vol von Lovwenberc her H von Vurberc Peter a der Egge C de Mechler C der Waldegger E der Vinke C Rovbli vnd dz allis dz hie vor geschriben stat deste vester vnd deste stester belibe so henkit graue Diethelm von Thoggenburc der hie vor ginemit ist sin insigel an disen brief Dis gischah ze Wile in der stat in hern Hainr Mvndlins hus nah vnsers herrin gibvrte thusent iar zwei hundert iar vnd dri vnd hahtzic iar an dem dvrnstage vor sant Thomas thult vor wihennaht