Charter Document - 04060195

Herre Cvonrat hern Azzen der amman von Kostinze kvndit allen die disen brief sehent vnd horint lesen daz herre Rvodolf von Rinegge der ritter vor im an sprach vron Gvoten Marquardis hvsvrovwen von Bvrgelon si waere sin Do sprach si si horte ze Petirshvsen Do wart ir ain tac gebin daz si fvr brehte ir herren der si werit nah rehte Ze ivngest wart in ain tac gebin fvr in an dem maentage vor sant Jacobis tvlt daz siv baidenthalp reht nemen Dar kam der abbit von Petirshvsen vnd ovch der Rinegger vnd div vrovwe vnd ir wirt vnd stvonden mit fvrsprechin Da wart der von Schoninberch vrtailde gevraget der ertailte bi dem aide mohti si der von Rinegge besezzin mit ir mvotir magen swer die waeren daz er des genvzze Do sprach herre Cvonrat der Joheler ez dvhte in nivt reht vnd ertailte daz er si nivt mohte besezzen wan mit ir mvotir magen die ir genoz waeren vnd wart ovch div vrtail div mere Do wart der von Schoninberch gevraget ob er sin vrtail wolte ziehen oder ieman in sinem taile Die en wolte er noch nieman ziehen in sinem taile Do sprach der von Rinegge so wolte er si besezzin als im ertailit were Daz wider sprach herre Cvonrat der Joheler vnd ertailte sit die vrtail nieman ziehen wolti daz der von Rinegge vber daz nivt me mit ir hete ze tvene vnd si solte horen ze Petirshvsen ane wider rede Daz wider sprach herre Marcquart von Schellinberch vnd ertailte daz vf sinen ait sit der von Rinegge sich vermesse er wolte si besezzin als im ertailt were mit ir mvotir magen vnd ir genozzen die besezzvnge solte man zvo lazin Div vrtailde wart div minre Do wart der von Schellenberch gevraget ob er die vrtail wolti ziehin oder ieman in sinem taile Do stvont herre Hainrich von Rinegge hern Rvodolfiz brvoder vf vnd sprach er wolte die vrtail ziehen nieman ze liebe noch ze laide wan dar vmbe daz si in reht dvhte vnd swur dez vf den hailigen vnd zoch die vrtail fvr den bischof vnd den vogit alse reht waz Vnd daz diz war si als an disem brieve geschriben ist vnd also beschach dar vmbe so git der vor genande herre Cvonrat der amman von Kostinze sin insigel an disen gegenwrtin brief Datum et actum Constantie loco et die antedicto anno domini MCCLXXXII presentibus quampluribus fide dignis