Charter Document - 04060178

Wir von gottis gnaden abbet Rvomo von sante Gallen kvnden allen dien die disen brief sehint alder horrent lesen dc wir haben gesezzit mit allem rehcte dvrhc vnsirs gottishusis nvzs vnde notdurfte den hofh ze Dielsdorfh ze einem rehctem phande ane den chilchvn saz den nemen wir vz vmbe fvnf vnde zweinzic marc Lutolt dem frien herren hern Volrihcs sailigens svn von Reginsperhc zvo drizic marchen die er ee dar vf hatte alse vnser brief hant die wir ime gegebin haben Vnde veriehen dc wir den selben vorgenanten hof niemer son verkovfen noh versezzin wir haben in danne vns vnde vnsirme gottishvse ee irloset an alle geverde Dis haben wir ime zvo vns ze troester gegebin vnsirn brvodirn vnsirn herren abbet Albrehcten von Ovwe dc es stete belibe Dis sint die gezvge die ze gegenwurte waren grave Friderihc von Toggenburhc Heinrihc von Bunishouen der korherre ze Bischofhcelle her Egelolf von Rorschahc her Walther von Bunishouen Ar von Steinimure Heinrihc von Ebenode vnde ander ersame livte Dc dis war si vnde stete belibe so henken wir abbet Albrehct von gottis gnaden ze Ovwe vnde wir abbet Rvomo von gottis gnaden ze sante Gallen vnde ihc her Eberhart von Bichilnse der druhsazze vnseru insigil an disen gegenwurtigen brief ze einem warin vrkvnde Diz geschach nah vnsirs herren geburte Iesu Christi tusint jar zwei hvndirt jar ahczic jar vnde dar nah in dem ersten jar ze Yberch in dem bovingarten an dem nahstem svnnentage vor sante Verenun tvlt