Charter Document - 04060175

Allen den die disen brief sehent oder hoerint lesen dvon ich Rvodolf vnde ich Covnrat wir gibrvodir von Bernegge mit disem brieve kvnt dc wir die virkovfunge vnsirs eigins Ivte vnde gvetes ze Ringwile dc vnsir vatir her Heinrich zi geginwirte vnsir mvoter vron Berthen hern Rvedingers vnde Heinrichis vnsire brvodere vnde vnsir beidir do wir niht warin komin ze vollen iarin gab zi kovfinne dem meistir vnde den brvederin von Bvobinkon santi Johannis spitalis von Jherusalem vol brahton ze Hvnwile in der kylchvn also dc wir vns mit vnsirs vater hern Heinrichis hant virzigin in hern Diethelmis hant von Windegge dem vnsir herre abbit Rvome von sante Gallin sinen gewalt dar vber gigebin hatte vnde sinen offin bref von vns vf ze nemmine vnde an siner stat in zi gebine Dar na do wir zi vnseren vollin tagin warin komin do irnvwirotin wir die vor ginantin gift also dc wir zi Rapretswiler in dere stat vor vnserm herren grauen Rvodolfe vnde vor vil anderen bidirbin lvtin des selbin kovfis vnde der vfgebvngi virjahin vnde dar zvo virzigin wir vns abir mit vnsirs vater hant gegin den vor ginantin brvederin von Bvbinkon allis vnsirs rehtis vnde allir der ansprache dv vns alde vnseren erbin vor geisclichem girihte alde vor weltlichem girihte gihelfin moehte vnde bistatons dar na zi dem selbin male mit einem offinen eide den wir dar vber zin heiligin sworin dc wir die brvodir von Bvobinkon alliwis an dem gvote vnde den lvtin so sv kovftin vmbe vnseren vater vnde in gewer vnde in gewalt dar braht hatton niemer geirrin svn mit keiner ansprache noch mit wortin noch mit werchen vnde ob sv dikeiner sicherheit me dir zvo bidvrfin wellin dc wir in des an allv giverde ze leistinne sin gebvndin vnde dc wir sin ir wem svn sin swa si es bidvrfint Vmbe dc dis allis stete blibe vnde vnzirbrochin alse hie vor mit schrift bischeidin ist so gebin wir disin brief den vor ginantin brvoderin mit vnsirre herren des abbitis von Rvti vnde grauin Rvodolfis des vorginantin vnde vnsirs vater hern Heinrichis von Bernegge insygilin bisigylt vnde givestint Diz gischach in der vorginantin stat in dem jare do von vnsirs herren gibvrte warin virgangin tvsint jar zwei hvndirt jar einz vnde ahzig jar vor den lvtin die hie nach gischribin sint hern Rvodolfi dem helpher von Glarus hern Rvodolfi von Wedinswile hern Conrade von Schalkon hern Rvodolfi vonmi Turni der ritire Conrade dem trvszesi von Einsidil Petir von Rambach Heinriche von Kaltbrvnnin Rvodolfi von Wagin Rvodolfi vnde Johannisi giheizin von Hyndirburg Dietriche des Sniders Bertholde dem Costenzer Walter dem Byziner burgerre von Raprethswiler vnde Rvodolfi dem Hovesteter von Walistade Petir Mvelistein von Wesin Heinriche dem Theschiler Wernher dem Brvnner vnde andirre lvti gnvg den zi gilovbin ist Wir Walter von hvnsirs herrin gnaden der abbit von Rvti des ordins von Premonstre vnde wir graue Rvodolf von Raprethswiler vnde ich her Heinrich von Bernegge dvr die bette Rvodolfis vnde Conradis des vorginantin hern Heinrichis svn von Bernegge habin disin geginwirtigin brief givestint mit vnserin insygilin an dem vor gnantin jar