Charter Document - 04060170

In dem namen vnsers herren amen Ich grave Friderich von Toggenbvrc kvnde allen dien die disen brief lesent alder horent lesen daz ich dvr got vnd dvr die liebi die ich ze dem closter ze Maggenovwe han gigeben han der abtissinne vnd dem convente vrilichen vnd ledecliche mit allem rehte min eigen ze Mose dc Amvr von Horwen von mir hate ze lehen vnd de eigen de herre Heinrich der Loewe von Zvcchenriet von mir hate ze Swarzenbach vnd dc eigen dc Heinrich ab Egge von mir hate ovch ze Swarzenbach vnd dc eigen dc herre Cvonrat von Mvnchwile von mir hate in Gebsatal vnd Heinrichen den Zehender den herre Eberhart von Bichelnse von mir hate vnd dc lehen dc Haertnit von Salwenstein von mir hate dc waz min lehen von dem gotshvse ze Ovwe dc selbe lehen lit in dem dorfe ze Ermvotingen Dc gab ich vf ze Ovwe swc inen von im wart dc ez inen von dem gotshvse verrihtet wrde Daz diz war si vnd ovch ewecliche staete belibe dar vber han ich disen brief gesigelt mit minen insigil zeinen staeten vrkvnde Des sint gezvge graue Friderich von Toggenbvrc grauen Craftes svn vnd Volrich von Bvssenanch vnd Bertolt der Lvbeler vnd Heinrich von Bvole vnd Volrich Snoede vnd brvder C der Giel vnd brvoder Albreht der Hvne vnd brvoder H loeche Dc diz staete belibe alse da vor gescriben ist dar vber wart dirre brief gegeben ze der Hohvn Toggenbvrc an dem tvsendosten vnd zwei hvndertosten vnd ahzegosten iare nach gottes gebvrte an dem vierden tage nach der tvlt Mathie apostoli