Charter Document - 04060166

In dem namen vnsers herren amen Allen dien die disen brief lesint alder hoerent lesin dien kvnden wir beide graue Diethelm vnd graue Friderich grauen Craftes svne von Toggenburc dc wir dvr got vnd dvr die liebi die wir han ze dem closter ze Maggenovwe gigeben han der abtissinne vnd dem convente vrilichen vnd ledecliche mit allem rehte vnser eigen ze Mose dc Amvr von Horwen von vns hate ze lehen vnd daz eigen dc herre Heinrich der Loewe von Zvcchenriet von vns hate ze Swarzenbach vnd dc eigen dc Heinrich ab Egge von vns hate ovch ze Swarzenbach vnd dc eigen dc herre Cvonrat von Mvnchwile von vns hate in Gebsatal vnd dc lehen dc Harnit von Salwenstein von vns hate ze Ermvotingen dc wc vnser lehen von dem gotshvse ze Ovwe dc lehen gaben wir vf swe inen von im wart dc ez inen verrihtet wrde von Ovwe wir kvnden ovch dc des selben lehens niht me wc wan ein wise dv heizet dv Hinder Wise vnd ervarnt die brvoder von Maggenovwe dc des gvotes ze Ermvotingen iht me von vns lehen ist des dem closter wart von Haertnit von Salwenstein denne dc da vor genenmet ist des sint sv vns gebvnden ze kvndenne vf ir warheit vnd nach vnseren minnon von vns ze gewinnenne vnd anders svn wir niemer enheine ansprache dar nach me gewinnen enhein wis Des sint gezvge herre H von Fvrberc vnd H von Honegge vnd H ab Egge vnd brvoder Albreht der Hvne vnd brvoder C von Niderndorf die brovder von Maggenovwe Dc diz staete belibe dc da vor gescriben ist dar vber han wir beide graue Diethelm vnd graue Friderich von Toggenburc disen brief gesigilt mit vnseren insigiln zeinem staeten vrkvnde Dirre brief wart gegeben ze Kostenze an dem tvsendosten vnd zwei hvndertosten vnd ahzegosten iare nach gottes gebvrte an vnserre vrown tage ze dem aernde