Charter Document - 04060163

Wir Rudolf von gotz genaden ze allen ziten ain merer des hailgen riches vnser gnad vnd alles gut allen Cristan luten die disen brief an sehent tund wir ze wissen dz wir luterlich von demuetiger festi wegen so der fest man Hainrich Walther von Ramswag vnser getruwer vnd geminter vns in vil Sachen erzoegt vnd bewaert hat festeklich vnd besunder in dem strit den wir hatton mit dem wirdigen hievor kung von Beham da er vns vf hub vß dem bacht da wir nider geschlagen lagent da mit er vns des lebens gehalf vnd den val der vns mit geding vf was gesetzt den want er vns Dz haben wir milteklich an gesehen vnd gebent im darumb funf hundert mark luters Silbers vnd verhaissent im die mit vnsern kungklichen gnaden vnd won wir im nu ze mal das vorgenant silber vsser vnser kamer nit mochtent vsrichten so setzen wir dem selben Hainr Walther in ze pfand den hof ze Kriesseren mit luten rechten vnd zugehorden vnd die frigen die da gehoerend in die vogtyg ze Gaegilmar ze Werzenberg ze Baldenwile ze Vnegg ze Swainberg vnd ze Vtzwil vnd ander fryen die darzu gehoerent vnd in die gericht die vnserm rich zu gehoerent vmb zwaihundert vnd zwaintzig mark des obgenanten silbers ze rechtem pfand da ie zwelf mark fur ain mark geltz gerechnet sint Vnd vmb die vbrigen druhundert mark zwaintzig mark minder verhaissen wir im vszerichten Vnd vber das gelt vnd das silber hat er mit vnserm willen vnd gunst ze gemainder genomen Burkart Dietrich vnd Cunrat von Ramswag gebruder die gemaind wir inen och mit vnsren kungklichen genaden bestaetent mit der bedingd wz si da von niessent es si von dem hof ald von den luten oder wie es sich gefuegt da sol in nut vmb ab gan an der geltschuld vnd an den nutzen vntz das si der vorgenanten zwaihundert vnd zwaintzig marken silbers von vns bezalt vnd gewert sint Des ze vrkund geben wir in disen gegenwurtigen brief besigelt mit vnser maiestat insigel ze ainer fester sicherhait Darumb sint zugen die wirdigen vnser die lieben fursten der ertzbyschoff von Saltzburg H Basiliensis Jo Chymensis et Secconiensis byschoeff Lupolt pfallentzgraf zum Rin hertzog ze Baw[ari]e Joh vnd Alb brueder hertzog ze Sachsen der jung markgraf von Brandenburg Ai vnd Hartman grafen von Habspurg vnd von Kyburg vnd der burggraf von Nuerenberg H graf von Furstenberg H margraf von Haperg vnd ander vil Geben ze Wien do man zalt von Cristus geburt zwelfhundert vnd nun vnd sibentzig jar vnd in dem sechßten jar vnsers riches