Charter Document - 04060158
| Charter Number: | 04060158 |
|---|---|
| Cartulary Title: | Chartularium Sangallense IV [St. Gallen] |
| Charter Language: | German |
| Charter Origin: | Religious |
| Charter Type(s): | Grant |
| Date: | 1279 |
| Date type: | Internal, A.D., Feast |
| Resource Link(s): |
Monasterium.net |
Charter:
In gotis namen amen Alle die disen brief sehin alde horen lesen die son daz wizzen daz wir von gotis gnaden abbit Heinrich von Vischinvn habin Bvrchartes seligen toher vron Hedwigvn Hans wirtennvn hern Atzin von Wil gigebin halbe an daz gotteshvz zi sante Johanne in Tvrtal mit vnsir brvoder dez convenz wizzende vnde willen vnde haben vns der selbvn vrovwen vnde der gebvrt so von ir kvmt halbteil enzigen eigenlich mit allem rehte halbteil belibet ovch vnserm goteshvse ze Vischinvn Dez sint gezivge her Heinrich der schvltheiz von Wil her Heinrich der Hvntzinchover Eber von Lovmeiz Bur von Heitnovwa Rud von Tvrbatun Vol der Trvonger her Bertolt der vogit von Tannegge Heinrich vnde Rvodolf sine svne Otto a der Wise vnde Heinrich sin brvoder vnde Bertschi a der Wise vnde ander ersam livte Daz diz war si vnde stete belibe dar vmbe henken wir vnsir insigel vnde vnsirs capittels an disen gegenwurtigen brief Diz geschah nah vnsirs herren gebvrte Iesu Christi tvsent iar zweihvndert iar sibintzich iar in dem nivnden iare an dem nehisten svnnentage vor sante Iacobis tvlt dez zwelfpotten in Bvrchartes seligen hvse an der Wise