Charter Document - 04060134

In deme namen des vatirs vnde des sunes vnde des hailigen gaistes Wir Rvomo von gottes gnaden der abbit von sante Gallen vnde allir der conuent gemainlichen des selben gotteshuses kunden allen den livten die nv sint aide noch geborn sont werdin aine gelovbsami allir der dinge so an dierre hantveste gescriben stant Swaz man kriegiger dinge nach wiser livte rate rihtet daz div ir ewigen craft behaben so lerit daz wiser livte rat daz man die rihtunge mit Worten vnde mit gezivgen vnde mit schrift an hantveste legin sol Da von so sint wir vnde vnsir conuent gemainlichen nach wiser livte rate ze rate worden die vns daz hant geraten mit gvoten triwen daz es vns bezzir getan si danne virmitten daz wir durch die liebi des vrien herren hern Rudolfes von Guttingen der vnsirme gotteshuse dike liebliche wol vnde nuzliche gedienet hat vnde noch gedienen mach vnde dar zvo wr allen den schaden so er vnsirs gotteshuses gehaben hat vmbetwngenlichen mit gvoteme vnde mit vrien willen sinen kinden div er hat bi vron Agnesun siner wirtinne vnde noch gewinnen mach vnde der selben vron Agnesen die burch ze Singinberc lihen vnde haben gelihen ze rehtim burchlehin mit dierre hantveste mit allime deme so dar zvo hoerit vnde hie nach mit Worten beschaiden ist mit allen den Worten vnde den gebaerden so man susgetaniv lehen nach rehte lihen sol Daz ist der hof ze Moershvobe der kelnhof ze Sitrundorf Snoeden hof dis Vessers hof der hof der da hazzit Andernowe div muli bi Singinberc vnde ain schvopvoze ze Sitrundorf vnde nemen vz mit worten beschaidenlichen alle die livte die dar zvo hoerint alse verre daz wir daz wellint da siv da mit inkain geschaffide noch dekaine gewaltsami haben sont vbir al Es ist ovch geredit vnde mit worten vber ain braht daz vns vnde vnsirme nachkomen swer der si dis hern Rudolfes kint von Guttingen vrowe Agnese sin wirtinne vnde er selbe gebunden sin mit dierre hantueste die selben burch ze Singinberc mit allime deme gvote so dar zvo hoerit wider sont gen ze kovffinne vnbe drizzich vnde hundirt marche gvotis vnde loetigis silbirs Costincer geloetis vnde dar zvo dis Vesers hof vmbe zwainzich marche Snoeden hof ze Sitrundorf vmbe vierzehin marche vnde also wirt des silbirs dar vmbe man kovffen sol vber al hundirt vnde vier vnde sehzich marche Wir haben ovch getaidingot vnde gelobit wr vns vnde wr alle vnsir nakomen daz wir noch dekain vnsir nachkomin die burch ze Singinberc ane daz gvot noch dis gvot ane die burch nivt kovffen sont wan burch vnde gvot baidiv samint mit ain ander Es sol ovch nieman kovffen wedir burch noch gvot wan ain ainwelliger abbit von sante Gallen vnde dierre kovf sol ovch niemanne werden wan deme gotteshuse ze sante Gallen Wan sol ovch wissen beschaehe daz div selben kint dis hern Rudolfes von Guttingen virwerint so sin wir gebunden die hundirt vnde vier vnde sehzich marche ze genne vron Agnesen sinir wirtinne vnde virwere vro Agnese so sin wir gebunden dim hern Rudolfe dis selbe silbir ze genne vnde sol er han die selben burch ze Singinberc in allim deme rehte alse ain man sin burchlehin han sol vnde sol deme gotteshuse von sante Gallen alliv div reht davon tvon div ain man von sinime burchlehine tvon sol vnz an die stvnt daz man es vmbe in kovffet alse man es vmbe siniv kint vnde vmbe sine wirtinne gekovffet solte han vmbe hundirt vnde vier vnde sehzich marche vnde alse da vor gesprochin ist der kovf sol nieman beliben wan deme gotteshuse ze sante Gallen Dir her Rudolf von Guttingen verzihit sich ovch gen vns vnde gen vnsirme gotteshuse allir der anesprache so er gen vns des tages hete han solte odir mohte vnde git vns wider mit gvoten triwen alle die hantveste dier hat von vnsirme gotteshuse vnde verzihit sich baidiv allir der selben hantveste scrift vnde craft Wir vnde vnsir conuent vergeben ovch dim hern Rudolfe von Guttingen vmbetwngenlichen mit vrien willen allen den schaden den er vns vnde vnsirme gotteshuse ie getet mit dekainir slahte dinge vnde verzihen vns allir anesprache dar ane Unde daz alliz daz da vor gesprochen stat von vns vnde von vnsirme conuent von dim hern Rudolfe von Guttingen sinen kinden vnde sinir wirtinne gen vns vnde vnsirme conuent staete belibe so verzihen wir vns gen ain ander ze baiden siten alliz gerihtes hilfe gaistliches vnde weltliches allir gesezzede allir gewonhait allir der hilfe so wir gen ain ander iemir an den zwain gerihten gehaben solten odir mohten vmbe dekaine die anesprache die vns gen ain ander vmbe daz vorgenante gvot iemer ze tvone beschaehe Wir verzihen vns ovch allir brieve die gewnnen sint aide noch gewnnen sont werdin von babiste von Rome von kaisirn von kunegen odir andirswannan vnde dar nach allir der hilfe von der craft von der liste alliz daz daz da vor gescriben stat aide ir dekaines sundirbaerliche geierrit zirstoerit zirbrochen aide widertan moehte werden aide sin craft verlieren Wir Rvomo von gottes gnaden der abbit von sante Gallen vnde vnsir conuent mit gemainime rate hiezin scriben dise hantveste vnde gebent si dim hern Rudolfe von Guttingen sinen kinden vnde sinir wirtinne vron Agnesen besigilt mit vnsirme vnde vnsrs conuentis vnsirs herrin abbit Albrehtis von Owe hern Rud dis Giels von Glatteburc vnde dis hern Rud von Guttingen isigiln besigilt ze ainime staeten vnde ewigen vrkunde allir der dinge so an dierre hantveste gescriben stat Uvir Albreht von gottis gnaden dir abbit von Owe vnde ich Rudolf dir Giel waeren taidinger vnde schaitlivte von baiden tailen willecliche vnde vriliche vnde ane alle betwngenschaft vsirwelt vnde brahten disiv taidinch vnde disen schait vbir ain mit deme gvoten vnde vrien willen vnsirs herren abbit Rvomen von sante Gallin vnde sines conu[ent]is ainhalb vnde anderthalb dis hern Rud von Guttingen vron Agnesen siner wirtinne vnde siner kinde Dis beschach ze Wile do nach vnsers herrin geburte waren tusinch vnde zwaihundirt jare vnde sibin vnde sibinzich iare in deme sibinden jare an dem vierden tage vor sant Thomas tage da ze gegen waren die gerten herren herre Cvonrat von Stoephiln her Walther von Kilichaim her Herman von Landinberc Hainrich von Bvnishouen Walt dir Tihteler die phaffen her Herman von Landinberc her Eber von Bichilnse her Vol dir Giel her Livtolt vnde her C die schenkin von Landecge her Walt von Ailgowe vnde ander erbaere livte genvoge