Charter Document - 04060122

In dem namen vnsers herren Allen den die disen gegenwrtigen brief lesent alder hoerent lesen den kvnde ich Friderich graven Kraftes svn von Toggenbvrch dc sich min veterre grave Friderich vnd grave Willehelm vnd min brvoder grave Diethelm enzigen hant des eigens an dem hove ze Hemberc mit allem rehte swaz sv daran hetton in mine hant fvr ein ledig eigen Dc beschach an sante Hylaerien abende in der stat ze Vzzenach Dc selbe eigen gab ich da zehant vnserre vrown vnd dem convente von Maggenovwe an der selbvn stat fvr ein ledig eigen Des svn wir alle viere die da vor genemet sint iro wem sin nah rehte Des ist gezvg herre Niclavs der lvpriester vnd herre Peter der Scriber vnd Albreht ab Egge vnd H von Wachingen vnd herre Volrich Hirni vnd H der Fvrderer vnd H der Gir Vnd dc diz staete belibe dc da vor gescriben ist dar vber han ich Friderich graven Kraftes svn vnd min vetere grave Friderich vnserv insigele zeinem staeten vrkvnde ane gehenchet Dirre brief wart gegeben an dem tvsendosten vnd zwei hvndertosten vnd siben vnd sibenzegosten iare nach gottes gebvrte an sante Hylarien tage