Charter Document - 04060118
| Charter Number: | 04060118 |
|---|---|
| Cartulary Title: | Chartularium Sangallense IV [St. Gallen] |
| Charter Language: | German |
| Charter Origin: | Lay |
| Charter Type(s): | Grant |
| Date: | 1277 |
| Date type: | Internal, A.D. |
| Resource Link(s): |
Monasterium.net |
Charter:
In dem namen vnsers herren So si kvnt allen den die disen brief horren lesen daz fro R hern Lvdiwiges frovwe von Brashberg hat gegeben vnd iriv chint mit ir wirtes gvnst hern Lvdewiges iro eigen daz da heizet ze dem Willer ime Riet an den spital ze sante Gallen dem heiligen geiste Vnde swenne diz selbe gvot ze bovwe wirt braht so sol der spital dirre vor genander frovwen alle iaerlichen geben zehen Schillinge Costenzerre phennigge vnz an ir tot ob sis nemen wil vnd swenne si irstirbet so sint dem spitale die phennigge ledich Diz geschach in der stat ze Wangen do man zalte von vnsers herren gebvrtlichem tage tvsent iare vnde zeweihvndert iare vnde sibench iare vnde in dem sibendem iare Disses sint gezvge herre Iohannes Ovgeli an dem margte vnd her Egelolf der Mvnser vnd her Jacob vnd her Henrich die Blarrer An disen brief so hat gehenchet div frowe von Brashberg ir insigel vnde ir wirts hern Lvdewiges vnd ir svn her Swiger der Tvmbe sin insigel ze eime gezvge vnd ze einer staste iemer me Amen