Charter Document - 04060114

In gottes namen amen Alle die disin brief lesent alder hoerent lesen die sont wizzen dc her Rvodolf von Rorschach vnd frov Willibirch sin husefrovwe vnd ir kint Rvodolf vnd ovch Rvodolf ir aegennen kneht Heinrichen der da heizzet Merboth von Lanquathvn vnd sinv kint dir maesterinun vnd dim conuenth der swestervn an dem Brvele ze sant Gallin ze aegenne hant geben ledeklich vnd vmbetwungelich durch got mitte allem dem rehte so siv in vnzher hant gehan vnd inzihint sich gegin im alles des rehtes vnd der ansprach so siv alder ir kint alder ir erben vmbe in ze geistlichim oder ze weltklichem gerrihte mohtin han vnd hant dc gelobet mit ir trivwen in aedes wise dc siv dien seben swestervn ab nemen vmbe den selben kneht alle klage vnd alle ansprach die siv mohten han von iro kinden die da ze gegin nivt waren vnd ist gedingot vnd ovch gelobet von dem selben hern Rvodolfe von Rorschach vnd von siner husefrovwen vnd von ir kindon die da vor genamt sint dc siv dir maeisterinun vnd dem vor genamthen conuenthe den selben kneht Hainrichen vor aim rehten herren vnd aim aenwellingin abbet ze sant Gallin mit vf genne vnd mitte allen dien dingen virrihten als ez ovch gedinget wart ze tvenne vmbe dc gvot ze Lanquathvn vnd vmbe Eberlin des selben Heinrichs brvoder ane alle geverde Das diz gedinge vnd diz geschefte staete vnd veste allewegent belibe so henket herre Rvodolf von Rorschach sin insigil ze aim steten vrkvnde an dizin brief Diz beschach in dem dorfe ze Rorschach vor der mervn kilchtur vnderm helmhuze an dem maentage dim nehstun nach des hailigen krvzes tult in dem maeien do man von husirs herrin gottes gebortlichin tage zalt tuzint zwehvndert vnd sehs vnd sibinzig iar da wc ze gegin her Wernher der lupriester von Golda her Rvedeger lupriester ze Rorschach her Heinr vnd her Burchart von Wartinse Rvodolf von Ramsovwe Heinrich von Hyltinrieth Gotfr hern Rvodolfes amman von Rorschach maeister Herman von Riedern Volrich von Svlnz meister Cvonr Schili Rvodolf der Senne Cvonrad Lutman [] der keller von Rorschach Volr der Heder vnd maenge andere