Charter Document - 04060111

In deme namin dis vatirs vnde dis sunis vnde dis hailigen gaistis Ich Rudolf dir ritter von Rorschach tvon kunt vnde vir gihe offinlichen mit dierre hantveste allen den livten die von disime hivtigen tage si iemer mer gesehent odir gehoerint lesin daz ich durch got Iesum Cristum von himilriche swestir Mahtilte dir priolinne von Ranwiller vnde swestir Gvotun dir suppriorinne von Raine dir swestiren an dim Bruele ze sante Gallen vnde dar nach dim conuente vnde dir saemenunge allirsamint an dim Brvele ze sante Gallen han gegebin von der vndir wisunge des hailigen gaistis wr mich vnde mine erbin allesamint mit gvotime willen Ebirharten din Merboten von Lanchwattvn der min waz mit allime rehte vnde alse ich in han braht vnz an disen hivtigen tach Vnde virzihe mich dar vbir mit dierre hantvesten vnde mit disime brive wr mich vnde wr alle mine erbin von hivtte disime tage iemir mer allir der anesprache vnde alliz des rehtes so ich iemir gewinnen mohte an dem selbin Ebirharte an gaistlichime odir an weltlichime gerihte Unde daz die vorgenanden swesteran vnde iro conuent sich dierre gotlichen gabe vriliche vnde ledechlichen vrovwen iemir mer so gib inen dise hantveste ze ainime statten vrkunde besigilt mit minem ysigile ze ainir vestenunge alliz des so an dierre hantveste gescriben stat Dis beschach ze sante in dis grauen Willehelmis hus von Montfort do nach vnsirs herren geburte waeren tusinch vnde zwai hundirt jar vnde sehs vnde sibinzich jare in deme sehsten iare an deme naehisten maentage nach vzgantir ostirwchen ze geginwrte mins herren grauen Willehelmis von Montfort dis hern Cvonratis dis briestirs von dir schvole Hainriches dis kilichherren von Rivti dis hern Hainriches vnde dis hern Burch der rittere vnde gebrudir von Wartinse Cvonratis von Raine vnde andirre erbaerre livte phaffon vnde layen