Charter Document - 04060106

In dem namen des vaters vnd des svnes vnd des heiligen geistis amen Ich Diethelm von Togginbvrch chivnde allen den disen brief sehint alder hoerint lesin dc ich ane gesehin habe dc chvnftige zit der ewigen vroeden vnd han dvr miner sele vnd miner vorderen dem hvse ze Tobil vnd den brovdern von dem spital ze Ierusalem gegeben allis min eigin dez sigen livte alder govt niderthalp Gvnzinbach vnd die zwene kilchvn seizze mit allem deme rehte so dir zov hoerit ze Meirwille vnd ze Tivnbrvnnen dar zov lopt ich den vor genanten brovdern mit govten trvwon vnd scwor ins mit gelerten Worten ze den heiligon dc ich mit allen minen man lehin teite alliz des siv der mitte bedorftin vnd mich hiesin vnd niht anderz Dar zov wc ich scvldich vnd solte gelten ze Kostinze vnd ze Wintertvre vnd wc des ein teil vf min eit do kovfton mir ovch die selbin brovdir gewant vnd haton ovch andirz koste vnd scaden mit mir vnd von min scvlden dc sich div givlte vnd div koste mit rehter rechnvnge an zwei vnd fivnzich phvnt Kostinzeirre gezoh vnd wan ich dem selben hvse ze Tobile vnd den brovdern gegebin hate Heitnovwe vnd allis dc ich da hatte vnd den hof ze Obrahvsen vnd eine scovpoze dir bi vnd ein stvchi geltes ime Riete vnd siv de in gewer vnd in gewalt haton do gvlten siv fivr mich vnd koste namen si vber sich vmbe div vor genemten govtir dc inen div ewekliehe belibin noh ich noh enchein min erbe niemer enkein anesprache gewinnen svn mit weltlichem noh mit geiselichem gerihte noh mit enkeiner anesprache Vnd dc dis allis steite belibe als ez mit scrift hie vor besceiden ist darvnbe so gab ich disen gegenwrtigen brief den vor genemten brovdern gevestinet mit mime insygele vnd mit hern Hermanes von Bonsteten der lant rihter ze Tvrgov ist Diz bescah ze Bovbinchon in der mervn stvbvn an sante Stephans tage do nah gotis gebivrte wc tvsint vnd zwei hvndirt vnd sibenzech vnd sehz iar ze geginwrti herne Hermannes von Bovnsteten herne Vol von Rivsegge hern Hein von Sehein der ritere Niclav von Ottinchon [] dem marscalche von Raphehtscwille Ja von Rambach vnd H sime brovdere Vol von Wezinchon Rovdolf von Wagin vnd den brovdern des selbin hvsiz die ich alle vber dise vor genemten sache ze gezivge gibe