Charter Document - 04060104

In deme namin des vatirs vnde des sunes vnde des hailigen gaistis amen Swaz gvotir dinge vnde rehtir koeufe vndir Cristaenen livten beschiht daz div war vnde staete beliben iemmir mer niwelichen alse des tages do siv mit Worten ze saemine wrdin braht so lerit daz wisir livte rat daz man es mit hantvesten mit brieven mit erbaeren gezivgen vnde ysigeln veste vnde staete daz es iemir mer baidiv an gaistlicheme vnde an weltlicheme gerihte sine craft behabe alse es von rehte sol Dannan vone so kunden wir Ebirhart der eltir vnde Ebirhart der jungire von Bichilnse allen den livten die disen brief ane gesehint aldir iemir gehoerint lesin daz wir vns virzihint mit disim brieve vnde mit dierre hantveste des houes ze Lanchwattun bi Arbvn den vns dir herre Rudolf von Rorschach virsezzit hette in swestir Gvotvn hant dir priolinvn vnde des conuentis dir swestiron an dim Brvele allir samint mit allime deme rehte an livten vnde an gvote alse er vns virsezzit waz vnde mit swelheme gedinge er komin waz in vnsir hant Wir uirzihen vns ovch allir der anesprache vnde alliz des rehtis des wir aide vnsir erben von hivte disime tage iemir me an weltlicheme alde an gaistlicheme gerihte mohten gewinnen aldir han an disime selben houe Vnde tven daz dar vmbe wan vns dir herre Rvodolf von Rorschach vor disen selben hof virsezzit hat sine hove ze Tivffenbach ze Bvele vnde den der da haizzit Rietmuli Unde daz div priolinne vnde der conuent dir swesteron an dim Brvele die da vor genemmit sint baidiv von vns vnde von allen vnseren erben von hivte disime tage iemir mer allir anesprache vnde allir hande mvegie swie die genemmit sint odir namin hant alde noch namin gewinnen mvgen aldir sont sichivr vnde ledich sin so geben wir in dise hantveste vnde disen brief ze ainime statten vrkunde vnde gewaeren sichirhait alliz des da vor gescriben stat behenkit mit vnsir baidir ysigil Dis beschach ze Blidegge vor der burch in dem bovmgarten do nach vnsirs herren geburte waren tvsinch vnde zwai hundirt jar in deme viunf vnde sibinzegosteme iare in deme manode des selben jaris der da haizzit hewot an dim nahisten donristage desselben manodes vor sante Jacobes dult des hailigen botten ze gegenwrte der gezivge die hie nach gescriben stant dis hern Rvodolfes vnde dis herren Egelolfes sins brudir von Rorschach dis hern Wezzils dis marschalkis von Blideke dis hern Volriches von Vttewiller der rittere vnde brudir Berhtoldis dis laygen brudirs von sante Gallen vz dim Bruele vnde andirre bederbir vnde erbaerre livte Ich Berhtolt dir kilichherre von dim Wambrehtz der offen scriber waz der saeligen gehugede dis abbit Berhtoltis saeligen von sante Gallen scraip vnde tihtote disen brief ze der bette swestir Gvoten von Raine der priolinen vnde des conuentis dir swesteron an dim Bruele ze sante Gallen In gottis namen Iesu Christi amen