Charter Document - 04060101

Ez sun wizzen alle die disen brief iemer gesehent alde gehoerent lesen uor gerichte aide ane gerichte daz ich Johannes Ovgeli burger uon sante Gallen dien armen lvten in dem nidern spitale ze sante Gallen zewene mine zehenden der eine heizet ze Noevchelnhus der ander heizet amme Chaphe ze chovfenne han geben mit alleme rechte umbe zehen march loetigis silbers Chostencer giwegis Vnde han daz getan mit mins herren abbt Volrichs vnde de conuentis uon sante Gallen willen vnde gunst ane achust vnde ane alle giuerde mit gvoten willen vnde mit gvoten triwen vnde enzvhe ovch mich an disen brieue aller der ansprache vnde der wideruorderunge die ich alde min erben iemer gewinnen mochten an disen zewein zehenden vnde uergihe ovch des an diseme brieue daz ich ir were wil sin als ich ze rechte sol der zeweier zehenden swa sis bidurfen uor gerichte alde ane gerichte vnde dc ich die selben zehen march enphangen han uon inen vnde daz ich si bewendet han an die stat da ich wol bedorfte Vnde uon dien selben zewein zehenden sol man iemer me jergelich an sante Gallen tage geben ein halbiz phunt wachsis an daz Hecht des gotshuses Dirre chovf vnde diz gedinge beschach ze sante Gallen da die waren der namen hie nach geschriben stant her Volrich Lesti her Gerwig der Peier her Heinrich der Blarrer Chvonrat der Meier Heinrich Ovgeli Johannes Chuchimeister Heinrich Hurst Chvonrat der Wienachter Chvonrat der Zehender Chvonrat uon Engeciswiler Volrich der Burger Volrich Wiphe Heinrich von Watt vnde ander genvoge in deme jare do uon gottis geburtage waren tusent vnde zewei hundert vnde sibenzich vnde uunf jar an sante Bartholomes tage Vnde daz diz allez deste steter vnde uester belibe so gibe ich inen disen brief besigelt mit mins herren abbt Volrichs vnde des conuents uon sante Gallen ingesigele zeinem ewigen vrchvnde