Charter Document - 04060097

In gotes namen amen Wir Friderich der graue von Toggenburch vnd Diethalm sines broder selgen sun grauen Kraftes kunde[n all]en die nu sint alde noch sont werden geporen die disen brief horrent lesen do wir umbe alles dc gvot so an disem briefe ge[] dez bunden willeclich vnd vnbetwngenlich [als] wir saze heten ze svne vns dar umme schiedin Will von Toggenburch mins [Frid]eriches des vorgenemmeten bruder vnd unser oehaim her Volrich von Regenspurch die schieden vns alse hie gescriben ist mit [] willen Bi dem erstem so uergehen wir de [vns die] schaitliutte die da vor genemmet sint also schieden vnd vergehen bede an disem [brie]ve dc ich Friderich gib vnd han willeclich geben Diethalm minem veteren die burch ze Haitenowe vnd vergihe dc ich der sin we[]n allen stetten da er sin bedarf Da zu han ich im gege suben marche geltes bi der burch vnd swa ich im de gelt bi der burc[h nit] verrichten mag so sol ich ims verrichten anderswa alse mich herre Cvonrat von [M]unchwille her Hainrich von Wilden[rain vnd Cvo]nrat der Mocheler haisent Ich gip ovch der kilchen saz ze Merwiler vnd ze Tuffenbrunnen Ich gip ovch alle die lute die vnderun[]em Gunzenbach sizzen de geburlivte s[int] die sin brvoder Friderich mir gap Da wider vergih ich Diethalm dc ich Friderich m[inem veter]en der da uor genemmet ist han gegen Toggenburch Rudenberch vnd Liehtunstaige mit allem rehte mit aller ehahti an min [eige]n lehen vnd min edelen liute Ich gip ovch alles dc gut vnd alle die liute die oberunt dem Gunzenbach sizzent vnd der kirchen [] Magolfesperc Liutinspurch vnd ze Vzenach Des gutes sol ovch ich sin wer sin an allen steten da er sin bedarf vnd sol im vf mit eigenne mit lehenne vnd mit anderm dinge tun swes er dar zvo bedarf Swc ovch Willehelm von Toggenburch mines Friderich []es Dieth muter des gutes aide der liute haint swenne sive beidiv aide einweders sich da von tut aide lebende schaidet dc son wir gemainlich tailen Ich Diethalm vergih ovch wil ich die burch ze Haitenowe verkoufen dc ich die sol Friderich minem veter [] vor gescriben ist vnd genemmet geben viur sehzech marche lothiges silbers nach Kostenzaere gelothe Die siben marke geltes die mir min veterre zvo der burch gap ze Haitenowe vnd die liute wil ich verkoufen die sol ich gen im alse mich der von Wildenrain [vnd Moche]ler haisent dc dise stete belibe da verzihen wir vns beide alles schirmes aller hilfe aller clage an gaislichem vnd an weltlichem gerihte vnd ovch aller der brieve von Rome vnd Magenze von Kostenze von kaisern von kunge aide swannan wir si erwer[] vnd aller gesezete gescribens rehtes gewonhait alder kunfteger gesezede diu nu geschehen ist aide geschehen sol von gaislichem alde von weltlichem gerihte von steten alde swannan es geschehen mohte mit den alde mit dem dc da vor gesc[] an allem alde an kainem sinem taile wider tun mohte werden Da zvo han wir gesworen beide willecliche vffen den hailigen dc wir staete son han swc hie vor gescriben ist vnd swedere dem anderm ivt tut dc dem anderm schade waere [] an disem brieve dc er ist mainaide elos vnd rehtelos vnd binden uns dc unser herre der ze Kostenze ze ainem bischoffe ist gewelt vnd sin nachkome ob er enist an allen furzoch an alle furladunge ze hanne sol tun swenne es d[]an dem dc da vor gescriben ist an ainem taile alde gar zerbrochen wirt Swer ovch der ziuge die hie nach gescriben sint nit ain vol fri man ist da ziehen wir vns an disem dinge von vnserm rehte vnd geben in dc rech de si [] vber vns mugen sin geziuge Die geziuge die har an waren dc ist Willehelm von Toggenburch der vor ge[nemme]te her Liutolt vnd her Volrich von Regensperch vnser oehaim her Eberhart der truhsaze von Michelnse her [] der alte von Stainimure her Hainrich von Wildenrain her Cvonrat uon Munechwiler Siurit von dem Tor Arnolt von Wildenrain der Stulseze von Warte Hainrich Volchi von Kostenze Herman von Hadelichon vnd Cunrat []netale Dc dis staete belibe dc hie vor gescriben ist so wrben wir dc vnser herre der ze bischoffe ze Kostenze ist erwelt vnser oehain von Regensperch Willeheln von Tockenburc der truchsaze von Michelnse die vor g[enemmt]en ir insigel vnd ovch wir vnseriv zwai an disen brief taeten vnd hiengen Dis geschach ze Kostenze do von gotes geburte waren tusent zwaihundert subenzec vnd fuenf iar an dem zinstage vor dem balme tage