Charter Document - 04060080

In dem nam[in] des vatirs vnde des sunis vnde des heiligin geistis So grvoez ich Volrich von den gnaden gottis irwelt zi abbte zi sante Gallin alle gilovbigin livte vnde wunsh in heilis von ewon vnde zi ewon Swaz nivzir dinge an disim vuruarndim zite gishiht daz div mit dem selbin zite iht mugin viruarn so pfligt man siv an schrift vnde vndir ersamir gezivge hugide nam[in] ze sezzinne Dannan von so kvndin wir allen den die in Cristis nam[in] gilovbig sint ald iemer werdint si sin nv geborn aide si suln noch geborn werdin die disin brief iemer gisehint aide dir von iht horint sagin daz wir durch die bette vnde die liebi aller der stat zi sante Gallin mit dem willin vnsirs capitils vnde mit dem rate der tivrston vnsirs gotshusis dienstmanne daz alte reht der selbin stat widir gimachit hein vnde ir dise hantvesti dar vbir gigebin han widir den hantvestinon die ir zi einer allichir brunst virbrunnin warin da ez von altir an gischribin waz vnde die ir von vnsirm gidigine vnde von keisirn vnde kvnigin gigebin vnde giuestint warin Daz selbe reht daz ist alsus gishaffin daz alliz daz gvot daz inrunt den vier crivcin vnde von der obenendi der berge bi dir stat dis inhelde zi tale lit swelher hande livte daz nv habe ald iemer rehte vnde rediliche giwinne alde von swem man ez heige aide reht vnde rediliche giwinne dc daz in dem selbin rehte stande alse Costinzer eigin an erbinne an virkovfinne an virsezzinne ane das dc ienz eigin vnde dis lehin ist vnde ane daz obe ein kovf hie sol gishehin dc der virkovfinde vf sol gebin in dis lehinherrin hant swer der ist vnde sol ez der kovfinde dannan enpfahin vnde dim herrin ein vierteil lantwinis sol gebin Hat abir ir einer aide si beide dez herrin hulde niht vnde wil er da von inen rehtis lihins vnde inphahins virzihin so sol man im aide sinem ehaldigim ammanne den win biettin vnde sol der kovf zi rehte irgangin sin wan swenne der kovfinde darnach iemer daz mag biredin mit zwein sinen husgnozzin so sol im enz an sinem rehte enhein schade sin Vmbe dis erbin ist ez alsus geshaffin swer dissis gvotis iht hat ez si man aide wib stirbit der ane kint den sol sin nahister vatermag erbin ez si wib alde man Vindit aber man der enheinin so sol ez mvoter halb das nehiste tvn Wil ovch ieman diz gvotis iht virsezzin in phandis wis der sol dar gan vnde sol mit dir hant drane grifin vnde sol ez in phandis wis in ienz giwalt der ez virphendin wil gebin vnde sol dar zvo in heinin herrin nvt ansehin Inhein man alde wib der dissis gvotis hat der sol niene drumbe zi rehte stan wan vf der pfallinze zi sante Gallin vnde eht vor dim abte vnde sol ez ovch niene mit virliesin noch giwinnen wan mit dem rehte vnde mit der vrteilde da mit ovch Costinzer ir eigin bihabint vnde virlierint Wirt ovch et me dan ein vrteilde vber daz selbe gvot gisprochin vnde bilibint die hie vngisaminot also dc der strit hie niht mag gisheidin werdin so sol manz darvmbe niene ziehin wan sol eht die di vrteilde gisprochin hant zi Costinzeren sendin ir reht drvmbe da zirvarne vnde swaz die wider sagint dar nach sol ez der abt endilichin rihtin Wir virgehin ovch an disem selbin brieue dc wir von deheinim menschin der nit semper ist noch burger reht hat mit swelm andirm rehte er vnser gotshus anhort vnde der doch zi sante Gallin sezhaft ist vnde den burgern wachen hilfit vnde dem riche stivre gebin deheine ansprache an in alder an sine erbin svlin habin weder an ligindim gvote in den vier ervein vnde obenendi der berge alse dir sne shlifit noch an deheinim sinim vardim gvote swa er ez habe ane das allein dc er sin tivrste lebindis gvot ze valle gebin sol vnde obe er dez nit hat ist er ein hagistolz dc er denne gebe zi valle alse er an dim svnnintage zi chilchin gat Vmbe diser selbin livte erbin ist ez alsus geshafin dc kint vnde wib erbint obe si div hant obe si der inwedirs hant so erbint si ir nehistin vatermage ez si wib alde man vindit aber man der enheinin so sol ez mvoter halb das nehiste tvon Ist aber dc si diser erbin allir enheinin hant so sol daz gotshus alliz ir gvot in sine gewalt ziehin vnde bihaltin iar vnde tak vnde sol antwurtin in der selbvn frist allen den die von rehtim erbe deheine ansprache daran hant Wir viriehin ovch an disem brieue swer ein semper man ist alde burger reht hat dc den nieman ierrin sol er mvge mit sinen kindin komin ze closter alde ze der e swar er wil Wir viriehin des ovch dc die burger von sante Gallin weder vns noch nieman deheinir stivre shuldik sint wan vierzik phunde Pfenninge sante Galler mvnze die si dem riche allir ierliche ze vogtstivre gebin sunt vnde dc ez si schirmin sol vnde bileitin alse ander sine stette Wir irkennin ovch an disem brieue vnde gelobin hie zigegin mit gvoten trivwin mit vnsers capitils gvnst dc weder wir noch dehein vnser nachkome noch nieman an vnserre stat den zol zi sante Gallin nemin sol wan der selbe zol vor langen ziten abe gekofit wart von einim burger der hiez herre Rvopreht von Irah vmbe vierhundirt pfunde vnde vmbe svmiliche berge bi sante Lienhartte vnde dar vbir brieue vnde insigil des abbitis der do waz vnde dez capitils wurdint gigebin vnde die selbin brieue abt Cvonrat nemin hiez in dem martirbilde ob der tovf bvttinne in dem munster einin zimberman der hiez Brivnink der ovch sit blint wart vnde dc der selbe zol von den ziten do er abe gikoofit wart vnz an abbit Cvonrattin von Bvssinank nie genomin wart alse vor vns vnde vor vnsirs gotshusis dienstmannin mit lebinden gezivgin biredit wart Vnde zi einer ganzer vnde ewiger staeti allir der dinge der wir an disim brieue viriehin habin so geloben wir mit gvoten trivwin dc wir werbinde sigin mit flizze dc disv hantuesti bistetit vnde bisigilt werde von dem riche swenne daz kvmit Vnde uiriehin ouch dc man inheinen burger von sancte Gallin heftin noch phendin sol an libe noch an gvote weder vur abbit noch vur vogit er sies danne selbe givlte alde bvrge