Charter Document - 04060039
| Charter Number: | 04060039 |
|---|---|
| Cartulary Title: | Chartularium Sangallense IV [St. Gallen] |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1269 |
| Date type: | Internal, A.D., Calendar |
| Resource Link(s): |
Monasterium.net |
Charter:
In nomine domini amen Facilius ad memoriam reducitur quod apicibus scripturarum memorie commendatur Noverint igitur universi quod nos Berhtoldus miseratione divina abbas monasterii sancti Galli ad multam ac magnam petitionem et instantiam dilecti fidelis nostri domini Volrici nobilis viri de Reginsperch bona nostra in Copoltis que ad nos et monasterium nostrum iure proprietario pertinere noscuntur que etiam dictus nobilis a nobis tenebat in feodo fratri Conrado commendatori hospitalis sancti Johannis in Clingenovwe nomine domus ipsius cum omnibus suis pertinenciis videlicet agris pratis silvis nemoribus pascuis viis et inviis aquis aquarumve decursibus eo iure quod vulgo dicitur erbelehin contulimus pleno iure ita videlicet quod dicta domus nobis et monasterio nostro in recognitionem dominii singulis annis unam libram cere in festo beati Galli persolvere teneatur Et ut predicta plenam obtineant roboris firmitatem presens instrumentum dedimus prefatis commendatori et suis confratribus universis sigilli nostri munimine communitum Acta sunt hec Renaugie anno domini MCCLXVIIII XII kl marcii XII indict Presentibus nobilis viris dominis Friderico comiti de Tokenburch Cvonone de Tivfen Diethelmo filio suo Hain de Gutting[en] Rvodolfo de Tekenhusen et aliis multis