Charter Document - 04051162

Bertholdus dei gratia abbas Manegoldus decanus Albertus prepositus totusque conventus monasterii sancti Galli venerabilibus in Christo Willebirgi priorisse ac universo conventui sororum Vallis sancte Katharine iuxta Diezzinhovin salutem ac perseverantem in dei obsequio voluntatem Non inprovide olim prudens induxit antiquitas labiles hominum litteris immortalibus iuvari memorias ne processu temporum subrepens oblivio gesta detergat mortalium lites pariat mutuaque societatis humane federa sauciet et corrumpat Cupientes igitur vobis dilecte in Christo sorores que nunc superestis necnon et ecclesie vestre quieti prospicere in futurum tenore presentium protestamur quod urgente necessitate non tantum Romane verum etiam universalis ecclesie per maliciam Friderici quondam imperatoris multipliciter conquassate quoddam predium monasterii nostri situm in villa de Widinsdorf eiusque territorio in quo scilicet Rvodolfus Gielo nostre ministerialis ecclesie ius advocatie noscitur habuisse pro marcis octoginta quatuor ponderis oppidi de Diezzinhovin vobis monasterii vestri nomine comparantibus cum omni iure ac pertinentiis eius sub perpetua census annui prestatione vendidimus astringentes nos et monasterium nostrum ad periculum evictionis ipsius predii promittentes nichilominus ipsum predium si forte quodcumque advocatie seu villicationis sive aliud onus quodlibet haberet annexum nostris sumptibus et laboribus reddere prorsus liberum et immune Ceterum quia contractus huiusmodi scriptura interveniente vigorem accipiunt necessarium visum est conditiones pro monasterio nostro in hoc ipso contractu appositas hic similiter sicut vestras fecimus protestari quod videlicet acquisito vobis per hunc contractum dominio utili penes monasterium nostrum in prefato predio directum dominium remanet In cuius recognitionem monasterium vestrum ad prestationem unius fertonis cere nostro monasterio iure tenetur perpetuo Quem censum in festo beati Galli sive post dum tamen ante festum nativitatis domini proximo sequens custodi ecclesie nostre annis singulis vester nuntius exhibebit Ut autem predicta omnia firma et inconvulsa permaneant hanc presentem paginam vobis concedimus non tantum nostris abbatis scilicet ac conventus verum etiam illustris viri Hartmanni maioris comitis de Kiburch ac venerabilis viri [] prioris fratrum Predicatorum in Constantia necnon et discreti viri Rvodolfi Gielonis de Glatteburch sigillis evidentius consignatam Dat apud sanctum Gallum anno domini MCCXLVI indict quint V idus novembr