Charter Document - 04050427

[] abbati Augensi et Corrado decano de Wide Constantiensis diocesis et magistro Corrado scolastico Curiensi Cum dilectis filiis H presbytero et G procuratori O clerici constitutis in presentia nostra dilectum filium T subdiaconum et capellanum nostrum concesserimus auditorem idem procurator proposuit coram eo quod cum dictus presbyter super incestus crimine fuisset publice infamatus bone memorie [] Constantiensis episcopus Ordinarius iudex eidem purgationem indixit qui cum se purgare nequisset ab eodem episcopo fuisset in plena sinodo suis ecclesiis sententialiter destitutus quas ipse nichilominus detinuit aliquamdiu per violentiam occupatas Cumque postmodum idem presbyter cuiusdam consanguinei sui uxorem abductam in domo publice detineret ad petitionem H plebani de Herisio et quorundam aliorum clericorum Constantiensis diocesis dilectis filiis [] de Scennis et [] de Vstrou decanis eiusdem diocesis nostras dicimur sub hac forma litteras destinasse ut videlicet si dictus presbyter super crimine adulterii et incestus coram ipsis se purgare non posset ipsum pena debita castigarent Qui iuxta mandati nostri tenorem in negotio procedentes cum constitisset eisdem quod idem presbyter pro eo quod in purgatione defecerat ab episcopo memorato fuerat in sinodo condempnatus ipsum utpote contumacem predictis ecclesiis per sententiam privaverunt maxime cum de incestu et adulterii crimine tamquam de notorio manifeste liqueret eisdem dilecto filio [] abbati sancti Galli ad quem illarum ecclesiarum donatio pertinebat potestatem liberam concedentes ecclesias ipsas personis aliis conferendi qui eas postea supradicto clerico assignavit Verum idem presbyter ad sedem apostolicam veniens et falso se asserens pretermisso iuris ordine spoliatum ad [] abbatem de Domo sancti Petri et suos coniudices alteri parti omnino suspectos nostras litteras reportavit Qui eidem O litterarum ipsarum copia denegata et probationem ipsius super falsitate litterarum admittere recusantes iuris ordine pretermisso post appellationem ad nos legitime interpositam restitutionis sententiam pro eodem presbytero protulerunt quod se loco et tempore probaturum per testes legitimos proponebat Dictus vero presbyter ex adverso respondit quod licet super premissis criminibus ab inimicis fuisset emulis infamatus et a Constantiensi capitulo propter hoc eidem indicta purgatio ipsam tamen nullus recipere voluit licet eam paratus fuerit infra prefixum sibi terminum exhibere adiciens quod Processus iudicum predictorum debebat merito retractari cum lite non contestata et post appellationem ad nos interpositam presumpserint procedere contra eum Preterea dictus presbyter proposuit conquerendo quod cum a predicto O et complicibus suis predictis ecclesiis fuisset per violentiam spoliatus et ad supradictum abbatem de Domo sancti Petri ac coniudices suos primo et secundo ad [] electum Constanciensem restitutionis litteris impetratis per utrosque restitutionis meruerit beneficium obtinere idem O eum non est veritus sepius spoliare Unde cum propter hoc ipse cum complicibus suis excommunicationis sententia innodatus in sua contumacia perduraret predicto electo et coniudicibus suis dedimus in preceptis ut auctoritate nostra suffulti districtius inhiberent ne in locis in quibus idem excommunicati presentes existerent divina officia dicerentur et eosdem tamdiu appellatione cessante suspenderent a divinis donec sepe dicto presbytero de dampnis et iniuriis irrogatis satisfacerent competenter vel responsuri de tanto contemptu nostro se conspectui presentarent Sed ipsi ad appellationis diffugium convolantes contra prohibitionem ipsorum iudicum divina celebrant interdicti nec ad nostram presentiam responsalem transmittere curaverunt Licet autem idem presbyter ad abolendam omnem infamiam purgationem indictam sibi ab eodem electo non tamquam delegato sed ordinario curaverit exhibere sepe dicti tamen emuli eum non desinunt infamare Unde nobis humiliter supplicavit ut ab illorum impetitionibus absolutum faceremus ipsum predictarum ecclesiarum pacifica possessione gaudere illos legitime punientes qui excommunicati et interdicti divina presumpserunt officia celebrare Ad hec procurator adiecit quod dicta purgatio fuit ab electo recepta absente parte altera et penitus ignorante quod etiam se asseruit probaturum Hiis igitur et aliis que fuere coram capellano predicto proposita plenius intellectis licet littere ille que ad predictos [] de Scennis et [] de Vstrou decanos impetrate dicuntur vel ipsarum transscriptum ostensum non fuerit coram nobis quia tamen ex tenore relationis ipsorum quam dictus procurator exhibuit si etiam littere ipse ostense fuissent nobis constitit evidenter iudices ipsos pretermisso iuris ordine processisse tam processum eorum quam concessionem ecclesiarum a predicto abbate de mandato ipsorum factam auctoritate apostolica retractamus presertim cum relationis ipsius series repugnantia contineat et adversa Dicitur etenim quod crimine eiusdem presbyteri usque adeo publicum fuerat et notorium quod nullus inficiationis locus penitus existebat utpote cuius universus vicinie populus testis erat Et tamen ibidem premittitur quod eidem presbytero terminum peremptorium prefixerunt in quo si posset super infamia predictorum criminum canonice se purgaret cum nimirum si crimen notorium existebat non erat utique illi indicenda purgatio sed in eum condempnationis sententia promulganda Restitutionis quoque sententiam pro eodem presbytero a diversis iudicibus latam duximus approbandam presentium vobis auctoritate mandantes quatinus eundem presbyterum in corporalem possessionem predictarum ecclesiarum sublato cuiuslibet contradictionis et appellationis obstaculo inducatis et defendatis inductum Contradictores siqui fuerint per censuram ecclesiasticam appellatione postposita compescentes et facientes eidem presbytero tam de fructibus medio tempore perceptis ex ecclesiis memoratis quam de dampnis et iniuriis irrogatis satisfieri competenter Facta vero restitutione plenaria si legitimus apparuerit contradictor qui possit et velit legitime comprobare quod idem presbyter pro eo quod in legitime indicta sibi purgatione defecit condempnatus fuit a predicto episcopo et sepe dictis ecclesiis spoliatus vos eidem super ecclesiis ipsis perpetuum silentium imponatis facientes eisdem per eos ad quos pertinet de personis idoneis canonice provideri Si vero nullus apparuerit legitimus accusator et ipsum inveneritis apud bonos et graves super predictis criminibus vel ipsorum altero infamatum purgationem ei canonicam indicatis non obstante quod coram predicto electo dicitur se purgasse cum pendente coram delegatis iudicio non debuerit ordinarius purgationem indicere infamato in qua purgatione si forte defecerit iuxta premissam formam ipso ab ecclesiis prorsus amoto provideri eisdem canonice faciatis Nullis litteris obstantibus preter assensum partium [] Quod si non omnes [] Dat Rome apud sanctum Petrum IIII idus ian anno decimo