Charter Document - 04050402

Eugenius episcopus servus servorum dei dilectis filiis Bruchardo abbati monasterii sancti Johannis Baptiste quod in parrochia Constantiensi situm est eiusque fratribus tam presentibus quam futuris regularem vitam professis in perpetuum + Quotiens illud a nobis petitur quod religioni et honestati convenire dinoscitur animo nos decet libenti concedere et petentium desideriis congruum impertiri suffragium Eapropter dilecti in domino filii vestris iustis postulationibus clementer annuimus et prefatum monasterium in quo divino mancipati estis obsequio sub beati Petri et nostra protectione suscipimus et presentis scripti privilegio communimus statuentes ut quascumque possessiones quecumque bona idem monasterium inpresentiarum iuste et canonice possidet aut infuturum concessione pontificum largitione regum vel principum oblatione fidelium seu aliis iustis modis deo propitio poterit adipisci firma vobis vestrisque successoribus et illibata permaneant In quibus hec propriis duximus exprimenda vocabulis videlicet Ilnovvo Magoldesberch Pussenanch Hiltensovvo Haltenrieth cum appenditiis suis Obeunte vero te nunc eiusdem loci abbate vel tuorum quolibet successorum nullus ibi qualibet surreptionis astutia seu violentia preponatur nisi quem fratres communi consensu vel fratrum pars consilii sanioris secundum deum et beati Benedicti regulam providerint eligendum Prohibemus etiam ne quis hereditario iure advocatiam ipsius loci usurpare presumat sed iuxta fundatoris constitutionem illum quem abbas communi consilio fratrum providerit in eadem advocatia preficiendum hac conditione advocatum suscipiatis ne ipsam advocatiam seu alia bona monasterii temere inbeneficiare debeat vel oppressionem aliquam vobis inferre Quod si attemptare presumpserit et secundo tertiove commonitus nisi reatum suum digna satisfactione correxerit liceat vobis ipsum eadem advocatia privare et in loco eius simili tenore alium idoneum substituere Decernimus ergo ut nulli omnino hominum liceat ipsum monasterium temere perturbare aut eius possessiones auferre vel ablatas retinere minuere seu quibuslibet vexationibus fatigare sed omnia integra conserventur eorum pro quorum gubernatione et sustentatione concessa sunt usibus omnimodis profutura salva sedis apostolice auctoritate et diocesani episcopi canonica iustitia Si qua igitur infuturum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita si non satisfactione congrua emendaverit potestatis honorisque sui dignitate careat reamque se divino iudicio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Iesv Christi aliena fiat atque in extremo examine districte ultioni subiaceat Cunctis autem eidem loco iusta servantibus sit pax domini nostri Iesv Christi quatenus et hic fructum bone actionis percipiant et apud districtum iudicem premia eterne pacis inveniant + Amen Amen Amen + Ego Evgenius catholice ecclesie episcopus subscripsi + Ego Gregorius presbyter cardinalis tituli Calixti subscripsi + Ego Aribertus presbyter cardinalis tituli sancte Anastasie subscripsi + Ego Octauianus presbyter cardinalis tituli sancte Cecilie subscripsi + Ego Rolandus presbyter cardinalis tituli sancti Marci subscripsi + Ego Gerardus presbyter cardinalis tituli sancti Stephani in Celio monte subscripsi + Ego Johannes presbyter cardinalis tituli sanctorum Johannis et Pauli subscripsi + Ego Cencius presbyter cardinalis tituli sancti Laurentii in Lucina subscripsi + Ego Henricus presbyter cardinalis tituli sanctorum Nerei et Achillei subscripsi + Ego Gregorius sancti Angeli diaconus cardinalis subscripsi + Ego Johannes diaconus cardinalis sanctorum Sergii et Bachi subscripsi + Ego Ildebrandus sancte Rom[ane] ecclesie diaconus cardinalis subscripsi + Ego Gerardus sancte Rom[ane] ecclesie diaconus cardinalis subscripsi + Ego Odo sancte Rom[ane] ecclesie diaconus cardinalis subscripsi Dat Signie per manum Bosonis sancte Romane ecclesie scriptoris IIII non octobr indictione XV incarnationis dominice anno MCLII pontificatus vero domni Eugenii III pape anno VIII