Charter Document - 04050361

In dem namen diz vaters vnde dez suns vnde dez heiligin geistiz amen Alle die disin brief sehint alde hoerint den sol daz kunt sin daz graue Ruodolf uon Raprehtiswiler hern Niclause uon Kaltebrunne ze histure zuo sime wibe uron Berhtun uon Halberc XX marc guotis silbirs Zuerichaer giwaegis lopte ze gebinn vnde daz diu graeuinne sit sines todes hern Niclause vnde sime wibe uron Berhtun den hof ze Richinbah mit grauen Hugis uon Werdinberc vnde mit ir erbon hant fur daz selbe silbir mit allem rehte hat gigebin also daz er in ane suende mit rehte nieze vnde habe vnze daz in diu graeuinne aide ir erbin alde abir dir abbit von Wetingin mit den XX marc manen alse im gilobit wart Swenne daz gischit so sol her Niclaus den hof uf gen lediclihe Dis gischah ze Raprehtiswiler an dem jare do uon vnsirs herrin giburt was gesin MCCLXIII an dem eilftin tage redemanodis Dis sint die lute die dran warin her Ruodolf a dem Turne her Vol vnde her C dir Bumbiler her Ber uon Kaltebrunne riter Bur a dem Turne Wer dir Bibir C Ruemir C uon Haltberc dir amman von Walastade dir amman uon Grifinse Vol dir Snezer Daz dise brief uestenunge vnde ortfrume habe so ist er mit dir graeuinne vnde mit grauen Hugis uon Werdinberk insigeln geuestit