Charter Document - 04050357
| Charter Number: | 04050357 |
|---|---|
| Cartulary Title: | Chartularium Sangallense III [St. Gallen] |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1262 |
| Date type: | Internal, A.D., Feast, Papal |
| Resource Link(s): |
Monasterium.net |
Charter:
In nomine domini amen Scire debent universi tam presentes quam posteri quod nos Manegoldus decanus totusque conventus monasteri sancti Galli deliberatione prehabita diligenti de communi omnium nostrum assensu et voluntate accedente nihilominus pleno et expresso consensu et permisso domini Bertholdi dei gratia abbatis sancti Galli nostri statuimus ut de omnibus prelaturis officiis beneficiis seu administrationibus quibuslibet monasterii nostri prebenda carnium sicut instituta est vel adhuc instituetur de festis duntaxat aut anniversariis contingens sive nova dicantur servitia seu vetera plenarie ministretur nec alicuius incidentis ieiunii vigilie aut sexte ferie occasione obmittatur aliquatenus vel mutetur sicut hactenus fieri consuevit Ad cuius utique statuti observantiam et ratihabitionem perpetuam nos qui presentes sumus fide manuali prestita nostrosque posteros obligamus et astringimus universos cartam super hoc de mandato nostro confectam memorati domini abbatis et nostro sigillo facientes roborari ad maiorem evidentiam et cautelam renunciantes omnibus actionibus per quas prescriptum statutum nostrum posset a nobis vel ab aliis in posterum irritari vel aliquatenus impediri Actum in capella beate virginis ante capitulum nostrum anno domini MCCLXII in festo sancti Columbani pontificatus domini Vrbani pape quarti anno II