Charter Document - 04050346

Omnibus hanc paginam inspecturis nos Albertus Augiensis et Bertholdus sancti Galli dei gratia abbates noticiam rei geste Mota questione inter nobilem virum Reingerum de Vatz et religiosos viros Eberhardum abbatem et conventum de Salem super curia in Sevelt cum omnibus integraliter possessionibus et iuribus ad ipsam et ex ipsa spectantibus nec non et aliis possessionibus et decimis sitis in Steten in Obern Steten in Rivterswilaer in Baitenhusen in Tuhtenhusen in Braitenbach in Shiwendorf in Taisendorf in Cuzenhusen in Ramsbach in Ober Riedern in Gerboltswilaer in Grasbivrron in Hallendorf in Mimmenhusen in Milnhouen in Voldingen in Stat Voldingen in Kaltenbrunne in Muron in Wanzenrivti in Meincelshusen in Wath in Rieth in Nusdorf in Tisendorf in Biernowe in Tiuingen in Ralshouen in Shaienbuch in Regenoltshusen in Oetenhusen in Richolfberg et in Tandingen quas dicebat idem Reingerus iure successionis ad ipsum pertinere monasterio in contrarium asserente huiusmodi possessiones et decimas in ipsum iure tam donationis quam emptionis per viros nobiles Ruodolfum et Marquardum filium suum patrem videlicet iam dicti Reingeri de Vatz translatas fuisse exhibitis super hiis publicis instrumentis in quibus premissa continebantur et in quibus Rudolfus avus suus et Marquardus pater suus iam dicti recognoverunt quia propria sigilla non habebant sigillis venerabilis in Christo Volkardi dei gratia quondam Curiensis episcopi eiusdem quoque capituli nec non prepositi sancti Lucii et Waltheri fratris iam dicti Ruodolfi se usos fuisse quibus sic propositis et auditis tandem in nos tamquam in arbitratores ab utraque parte exstitit compromissum Nos vero deliberato consilio attendentes quod laici monasteriis oppido sunt infesti unde non expedit viris religiosis cum laicis aliquatenus litigare quoniam timetur quantumcumque iuris habeant ipsa monasteria quod ipsis que mala sunt in litigiis fiant deteriora ut igitur que plana sunt efficiantur planiora sic ordinavimus inter partes ut dictus Reingerus receptis XXX marcis argenti legalis et uno palefrido a monasterio supradicto in omnem contractum habitum inter predecessores suos tam patrem quam avum et patruum et alios quoquo nomine nuncupentur prout in instrumentis continetur super hiis confectis sine qualibet contradictione libere consentiat casu quolibet contingente renunciando etiam omni iuri quod habebat vel habere poterat vel habere videbatur in decimis et possessionibus prenotatis In cuius rei testimonium presentem paginam tam sigillo reverendi in Christo patris et domini nostri Eberhardi dei gratia Constantiensis episcopi quam nostris nec non dicti abbatis et conventus de Salem et Reingeri sepe dicti de Vatz duximus muniendam Acta sunt hec aput sanctum Gallum anno domini MCCLXII XI kl marcii presentibus subnotatis videlicet magistro Hermanno de Schaphusa canonico Constantiensi Walthero dicto Lesti plebano sancte Fidis magistro Andrea de Willenberg Cuonr de Valkenstain magistro Johanne scolastico sancti Galli et Ruoperto de Jungingen clericis Eberhardo dapifero de Bichelnse Ruodolfo marscalco de sancto Gallo Hainr de Meldegge Egelolfo de Roggewilar Eberhardo de Langenhart et Ottone de Multis militibus Alberto de Griesenberg Cuonr de Obernberg Cuonr de Glotun Berhtoldo dicto Blaser Ruodolfo de Multis Johanne de Trasendingen et Berhtoldo de Loubun et aliis quam pluribus probis viris Nos vero abbas et conventus de Salem in predicta consensimus et nos consensisse profitemur sigillum nostrum presenti cedule appendendo Ego vero Reingerus recognosco me per presentes litteras in reverendos domnos meos Albertum Augiensem et Bertholdum sancti Galli abbates iam predictos compromisisse volens grata et rata habere omnia suprascripta ab ipsis tam rationabiliter ordinata renunciando pro me et heredibus meis insolidum hiis omnibus et singulis supradictis omni iuri legum et canonum beneficio seu etiam auxilio mihi vel ipsis contra contractus premissos quoquo nomine censentur vel contra partem adversam competenti vel competitura inposterum quarumlibet consuetudini approbate vel prescripte omni patrie vel terrarum statuto nove seu antique constitutionis beneficio litteris apostolicis super hiis inpetratis vel inpetrandis nec non omnibus aliis per que premissa possent inpediri promittendo legalem prestare warandiam si requisitus fuero de omnibus supradictis Profiteor etiam me recepisse XXX marcas argenti legalis et unum palefridum prout ordinatum exstitit per predictos unde sigillum meum presentibus duxi apponendum Nos vero Eberhardus dei gratia episcopus Constantiensis ad preces reverendorum in Christo Alberti Augiensis et Bertholdi sancti Galli abbatum sepe dictorum nec non ad petitionem partium sigillum nostrum presenti pagine apponi fecimus ad cautelam