Charter Document - 04050333

In dem namin diz vattirs vnd sunis vnd dis heiligin geistis Suln alle die wissin die disin brief an sehint daz her Rvodolf von Rorschach von sinis vattirs gvote Egilolue sinin brvodere gap din vierdinteil des gvotis des er imme zirehte teilin solte Vnd sint daz div gvot div hic nach gischribin stant div Egilolue sint wordin zi rehtim teile nach ir beidir frivnde rat vnd ouch nach der livte sage die vmb ir beidir teil gisworn hattin Daz ist der hof zi Tivfinbach livte vnd gvot mit allime rechte daz ist vier phunt phenninge von der altun vogitstivre in dem houe zi Rorschahc Vnd sol man ouch wissin daz her Rvodolf Egilolue sinem brvodere ouch gab drizic mark vur din vierdinteil sinre burc zi Rorschach alse si ouch in an kam von sinen bruodiren zi rechtime teile vnd gab imme ovch zwenzik mark vur eine huobe die er imme ouch solte han gigebin zi rechtim teile Da bi sol man ouch wissin daz der selbe Egilolf sich het vurzigin mvotwillecliche teilis widir sinem brvodir her Ruodoluen an Jacobe hern Rvodoluis amman an Diethelme von Golda an Cvonrate Liupman an Rvodolue dime Hamere vnd an den hagistolzen zi Rorschach mit wibin vnd mit kindin die hie ginemit sint also daz her Rvodolf die selbin sol Egilolue widerlegin als in her Cvonrat von Ramiswac heizit vnd dir Schenke von Landegke Vnd sol man wissin daz her Rvodolf ist gischeidin uon Egilolue sinem bruodere mit rechteme teile an liuten vnd an gvote wan alleine vmbe die edilin livte die ir vattir warin vnd umb die manlehin die man uon ir vattir hatte vnd ane die hagistolze die hie niht vzginomin sint Diz gischach vor dim appite Berhtolde zi geginwirtiv hern Heinrich von Valkinstein hern Rvodolue uon Guttingin hern Heinrich uon Griezinberc hern Arnolde uon Bivrgelon hern Heinriche uon Rauinsburc hern Egilolue von Rosinberc vnd hern Egilolue von Rosinburc hern Cvonrat von Ramiswak hern Heinriche dim Schenkin hern Wilhelme von Steina hern Goeswine von Emiz hern Cvonrat von Griminstein dim marschalke uon Valkinstein hern Bertholde von Annewiler hern Hermanne von Grvoninstein zwein von Edankiswiler hern Egilolue von Palus hern Heinriche von Tunretun hern Huge von Eschinze hern Rvodolue von Rinegke hern Wezzil Snoede hern Hartmanne von Nidirndorf Dise sint des gizivge daz diz gischach vnd sahinz vnd hortins Darzvo ist disiv gischiht bistetet mit appit Bertholdis brieue vnd mit sineme ingisigele