Charter Document - 04050326

Alexander episcopus servus servorum dei dilecto filio nobili viro [] comiti de Raprethteswilre Constantiensis diocesis salutem et apostolicam benedictionem Ad hoc de facili tua debet inclinari sinceritas quod a nobis digne requiritur et iustitiam continere videtur Sane dilecte in Christo filie [] priorissa et conventus monasterii de Bollingen Premonstratensis ordinis Constantiensis diocesis sua nobis conquestione monstrarunt quod licet tu eis dudum curtem de Wormesbach cum pertinentiis suis ad te spectantem pro tua et tuorum progenitorum salute pia et provida liberalitate donaveris dicteque priorissa et conventus illam per triennium et amplius pacifice possederint et quiete tu tamen ipsas postmodum predictis curte et pertinentiis quod non decuit te efficere contra iustitiam spolians eas quibusdam aliis de facto diceris contulisse in dictarum priorisse et conventus preiuditium et gravamen Cum autem ipse propter hoc duxerint ad apostolice sedis presidium humiliter recurrendum nobilitatem tuam rogamus et hortamur attente per apostolica tibi scripta mandantes quatinus circa dictas priorissam et conventum pro reverentia conditoris omnium cuius obsequiis sunt astricte pium et benivolum in domino dirigens benignitatis affectum eis prefatas curtem et pertinentias quantum in te fuerit sine dilatione restituere non postponas ita quod eis te in hac parte benivolum repperisse gaudentibus nos tibi exinde speciales gratias referamus Alioquin dilecto filio [] abbati monasterii in Blaburen ordinis sancti Benedicti Constantiensis diocesis damus per nostras litteras in mandatis ut te ad restituendum sibi prefatas curtem et pertinentias ut teneris monitione premissa per censuram ecclesiasticam sicut iustum fuerit appellatione remota compellat Dat Anagnie XVII kl iulii pontificatus nostri anno sexto