Charter Document - 04050325

Alexander episcopus servus servorum dei dilectis in Christo filiabus [] priorisse monasterii in Bollingen eiusque sororibus tam presentibus quam futuris regularem vitam professis in perpetuum Prudentibus virginibus que sub habitu religionis accensis lampadibus per opera sanctitatis iugiter se preparant obviam sponso ire sedes apostolica debet patrocinium impertiri ne forte cuiuslibet temeritatis incursus aut eas a proposito revocet aut robur quod absit sacre religionis enervet Ea propter dilecte in Christo filie vestris iustis postulationibus clementer annuimus et monasterium in Bollingen Constantiensis diocesis in quo divino estis obsequio mancipate sub beati Petri et nostra protectione suscipimus et presentis scripti privilegio communimus In primis siquidem statuentes ut ordo canonicus qui secundum deum et beati Augustini regulam atque institutionem Premonstraten[sium] fratrum in eodem monasterio institutus esse dinoscitur perpetuis ibidem temporibus inviolabiliter observetur Preterea quascumque possessiones quecumque bona idem monasterium impresentiarum iuste ac canonice possidet aut in futurum concessione pontificum largitione regum vel principum oblatione fidelium seu aliis iustis modis prestante domino poterit adipisci firma vobis et eis que vobis successerint et illibata permaneant In quibus hec propriis duximus exprimenda vocabulis Locum ipsum in quo prefatum monasterium situm est cum omnibus pertinentiis suis silvam quam habetis in loco qui dicitur Widereberge montem qui mons superior dicitur cum silvis terris pratis piscariis et omnibus pertinentiis suis paludes terras vineas et pascua que prope ipsum monasterium obtinetis castellare quod Bollingen dicitur cum omnibus pertinentiis suis fodinas lapidum et molendinum cum aquarum decursibus que habetis ibidem piscarias quas habetis in lacu qui Turicem vulgariter appellatur vineas quas habetis in villa que dicitur Chollichem pratum situm in loco qui dicitur Scachen cum terris pratis vineis nemoribus usuagiis et pascuis in bosco et plano in aquis et molendinis in viis et semitis et omnibus aliis libertatibus et immunitatibus suis Sane novalium vestrorum que propriis sumptibus colitis de quibus aliquis hactenus non percepit sive de vestrorum animalium nutrimentis nullus a vobis decimas exigere vel extorquere presumat Liceat quoque vobis personas liberas et absolutas e seculo fugientes ad conversionem recipere et eas absque contradictione aliqua retinere Prohibemus insuper ut nulli sororum vestrarum post factam in monasterio vestro professionem fas sit sine priorisse sue licentia nisi artioris religionis obtenta de eodem loco discedere discendentem vero absque communium litterarum vestrarum cautione nullus audeat retinere Cum autem generale interdictum terre fuerit liceat vobis clausis ianuis exclusis excommunicatis et interdictis non pulsatis campanis suppressa voce divina officia celebrare dummodo causam non dederitis interdicto Crisma vero oleum sanctum consecrationes altarium seu basilicarum benedictiones canonicarum a diocesano suscipietis episcopo siquidem catholicus fuerit et gratiam et communionem sacrosancte Romane sedis habuerit et ea vobis voluerit sine pravitate aliqua exhibere Prohibemus insuper ut infra fines parrochie vestre nullus sine assensu diocesani episcopi et vestro capellam seu oratorium de novo construere audeat salvis privilegiis pontificum Romanorum Ad hec novas et indebitas exactiones ab archiepiscopis episcopis archidiaconis seu decanis aliisque omnibus ecclesiasticis secularibusve personis a vobis omnino fieri prohibemus Sepulturam quoque ipsius loci liberam esse decernimus ut eorum devotioni et extreme voluntati qui se illic sepeliri deliberaverint nisi forte excommunicati vel interdicti sint aut etiam publice usurarii nullus obsistat salva tamen iustitia illarum ecclesiarum a quibus mortuorum corpora assumuntur Decimas preterea et possessiones ad ius ecclesiarum vestrarum spectantes que a laicis detinentur redimendi et legitime liberandi de manibus eorum et ad ecclesias ad quas pertinent revocandi libera sit vobis de nostra auctoritate facultas Obeunte vero te nunc eiusdem loci priorissa vel earum aliqua que tibi successerit nulla ibi qualibet subreptionis astutia seu violentia preponatur nisi quam sorores communi consensu vel earum pars consilii sanioris secundum deum et beati Augustini regulam providerint eligendam Paci quoque et tranquillitati vestre paterna in posterum sollicitudine providere volentes auctoritate apostolica prohibemus ut infra clausuras locorum seu grangiarum vestrarum nullus rapinam seu furtum facere ignem apponere sanguinem fundere hominem temere capere vel interficere seu violentiam audeat exercere Preterea omnes libertates et immunitates a predecessoribus nostris Romanis pontificibus monasterio vestro concessas necnon libertates et exemptiones secularium exactionum a regibus et principibus vel aliis fidelibus rationabiliter vobis indultas auctoritate apostolica confirmamus et presentis scripti privilegio communimus Decernimus ergo ut nulli omnino hominum liceat prefatum monasterium temere perturbare aut eius possessiones auferre vel ablatas retinere minuere seu quibuslibet vexationibus fatigare sed omnia integra conserventur eorum pro quorum gubernatione ac sustentatione concessa sunt usibus omnimodis profutura salva sedis apostolice auctoritate et diocesani episcopi canonica iustitia Siqua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita nisi reatum suum congrua satisfactione correxerit potestatis honorisque sui careat dignitate reamque se divino iudicio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Iesu Christi aliena fiat atque in extremo examine districte subiaceat ultioni Cunctis autem eidem loco sua iura servantibus sit pax domini nostri Iesu Christi quatinus et hic fructum bone actionis percipiant et apud districtum iudicem premia eterne pacis inveniant Amen amen amen Ego Alexander catholice ecclesie episcopus subscripsi + Ego Odo Tusculanus episcopus subscripsi + Ego Stephanus Prenestinus episcopus subscripsi + Ego frater Johannes tituli sancti Laurentii in Lucina presbyter cardinalis subscripsi + Ego frater Hugo tituli sancte Sabine presbyter cardinalis subscripsi + Ego Riccardus sancti Angeli diaconus cardinalis subscripsi + Ego Octauiinus sancte Marie in via lata diaconus cardinalis subscripsi + Ego Johannes sancti Nicolai in carcere Tulliano diaconus cardinalis subscripsi + Ego Ottobonus sancti Adriani diaconus cardinalis subscripsi Dat Anagnie per manum magistri Jordani sancte Romane ecclesie notarii et vicecancellarii VI id iunii indiction II incarnationis dommice anno MCCLX pontificatus vero domni Alexandri pape IIII anno sexto