Charter Document - 04050318

In nomine domini amen Ne ea que geruntur pro tempore simul cum tempore labantur testimonio scripture roborantur Proinde noverint omnes hortodoxe fidei professores quod nos Fridericus et Wilhelmus filii pie recordacionis Diethelmi quondam comitis de Toggenburg questionem et controversiam que vertebant inter nos ex una et viros religiosos Heinr abbatem et conventum monasterii de Ruti Premonstratensis ordinis ex parte altera super quibusdam bonis que iure hereditario nobis competere videbantur post multas et varias altercaciones in arbitros immo pocius amicabiles compositores videlicet Heinr venerabilem prepositum Imbriacensem et fratrem Volr de Wetzikon ordinis hospitalis Iherosolimitani compromisimus fide data hinc et inde quod eorum decisioni vel quod verius dici potest amicabili composicioni sine contradictione qualibet pareremus Qui quidem arbitri sic arbitrati sunt quod nos omni iuri quod in bonis paternis credebamus habere que quidem bona cenobium antedictum titulo empcionis vel donacionis a felicis memorie patre nostro quondam comite de Toggenburg et Diethelmo et Krafftoni fratribus nostris quorum neuter tempore empeionis et vendicionis dictorum bonorum filios vel filias procreaverat fuerat assecutum et specialiter iuri quod in Verrich in angendem Wald et Hirsindowe et Husinwile et Richon et illi quod a Pantlino milite titulo empcionis actum fuerat renunciaremus libere et absolute ipsi vero abbatis et conventus de Ruti XII marcas argenti puri a die lati arbitrii ad VIII dies et alias XII marcas a die pasce ad XIIII dies persolvere tenerentur Nos vero sentenciam ac decisionem dictorum arbitrum ratam et gratam habere cupientes vendiciones donaciones et omnes alienaciones quocumque nomine censeantur secundum quod a supramemoratis bone memorie Diethelmo patre nostro et Kraft et Diethelmo fratribus nostris et Fantlino milite celebrate noscebantur firmas et inconvulsas a nobis et heredibus nostris et a nobis descendentibus in manus abbatis dicti monasterii nos perpetuo promisimus habituros Insuper proprietatem bonorum suprascriptorum super quibus inter nos et ipsos contencio fuerat exorta et liberam et vacuam possessionem eorundem cum omni iure et pertinenciis suis quod nobis et nostris antecessoribus in eisdem competebat videlicet in pascuis compascuis pratis et nemoribus advocaciis iudiciis et altercacionum decisionibus cultoribus quoque et inquilinis predictarum possessionum cuiuscumque condicionis libere vel servilis existant in manus iamdicti abbatis nomine suo et nomine sui conventus resignavimus et tradidimus libere absolute et quiete et sine omni contradictione et inquietacione tam nostri quam cuiuslibet nostri successoris perpetuo possidenda promittentes bona fide quod neque per nos neque per aliquos nostros successores ad quevis obsequia indebita et vexaciones illicitas abhinc inantea compellentur homines antedicti Ut autem presens scriptum maius robur optineat firmitatis cum appendenciis propriorum sigillorum sigillis venerabilium dominorum nostrorum E dei gra[cia] Const[anciensis] episcopi et Ber sancti Galli abbatis et nobilis viri Lutoldi de Regensperg et viri religiosi Heinr procuratoris domus de Buobikon hospitalis Iherosolimitani et viri discreti Heinrici prepositi Ymbryacensis qui cum proprium non haberet sigillum sui capituli imposuit presentem paginam petivimus roborari Acta sunt hec aput Buobikon cum causa sepulture et exequii Gertrudis comitisse de Toggenburg celebrandi convenissemus presentibus testibus infrascriptis anno domini MCCLX ind III XI kln aprilis Testes autem sunt hii Volr de Hunwile canonicus Ymbriacensis et Conradus eiusdem ecclesie plebanus et Cuono plebanus de Jonun canonicus dicte ecclesie et Heinr plebanus de Hunwile Cuonr miles de Emrach Ber miles de Lobio Fantlinus Jacobus de Buole Joh Pfenli H de Buruelden Fridricus de Hertlingen milites frater R et frater Ber de Buobikon Berchtoldus de Hettlingen Fridricus Boclinus Burkardus de Hunikon et Heinricus filius suus Ruodolfus Busch milites et fratres de Buobikon frater Conradus de Nenczelingen Cysterciensis Cuor Eckol et frater suus Wernherus Hunolt Andreas cives de Rappreschwil Petrus Berchtoldus Huselin Volr Hirnli Volr Steinhi Volricus Costi Heinr Elsesser Ruodolffus Gespin Wilhelmus ab Egge cives de Vtznach et alii quam plures