Charter Document - 04050292

[] abbati sancti Galli ordinis sancti Benedicti Constantiensis diocesis Audita desolatione monasterii Augiensis que olim fiebat et fit assidue per Burchardum abbatem ipsius monasterii hominem utique multis criminibus irretitum nos dilecto filio [] abbati monasterii de loco Heremitarum ordinis sancti Benedicti Constantiensis diocesis sub certa forma damus nostris litteris in mandatis ut personaliter accedens ad locum et habens pre oculis solum deum si constiterit sibi rem taliter se habere dictum abbatem a regimine abbatie ipsius monasterii penitus ammoveat et eidem monasterio faciat de abbate ydoneo per electionem canonicam provideri Sane quidem abbas pro quadam suorum palliatione criminum que quasi nullum dicuntur posse recipere velamentum te sibi coadiutorem in regimine prefati monasterii a nobis olim per nostras litteras non facientes de premissis aliquam mentionem obtinuit deputari Ne autem occasione huiusmodi tam necessaria predicti monasterii reformatio retardetur predicto abbate dampnabiliter gloriante quod ipsius detestanda malitia usque in hodiernum diem remanserit impunita discretioni tue per apostolica scripta districte precipiendo mandamus quatinus dictum abbatem de loco Heremitarum quominus nostrum in hac parte mandatum iuxta formam ei traditam exequatur per te vel per alium nullatenus impedire presumas sed eidem potius oportunum ad hoc favorem et auxilium largiaris Alias autem litteras super hiis a nobis veritate tacita impetratas per quas tibi mandavimus quod eiusdem abbatis coadiutor existeres veris existentibus supradictis penitus revocamus et eas carere volumus omni robore firmitatis presertim cum dignum sit ut quicquid a nobis salutis obtentu tribuitur si pernitiem pariat ad nichilum redigatur Dat Viterbii non martii anno quarto