Charter Document - 04050291
| Charter Number: | 04050291 |
|---|---|
| Cartulary Title: | Chartularium Sangallense III [St. Gallen] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1258 |
| Date type: | Internal, Calendar, Papal |
| Resource Link(s): |
Monasterium.net |
Charter:
[] abbati sancti Galli Constantiensis diocesis Exhibita nobis dilecti filii magistri Conradi de Friburg rectoris ecclesie de Woluenwiller Constantiensis diocesis petitio continebat quod cum causa que inter ipsum et Conradum clericum natum quondam C Snewelin de Friburg militis eiusdem diocesis super eadem ecclesia orta extitit per appellationem partis alterius ad sedem apostolicam delata fuisset nos primo in ea dilectum filium magistrum Gregorium de Neapoli capellanum nostrum dedimus partibus auditorem qui cognitis eiusdem cause meritis et iuris ordine observato de quorundam fratrum nostrorum et aliorum peritorum consilio necnon ipso rectore et curatore clerici supradicti presentibus diffinitivam pro eodem rectore sententiam promulgavit Et licet idem curator nomine ipsius clerici a sententia ipsa duxerit ad nostram audientiam appellandum nosque super hoc dilectum filium nostrum H tituli sancte Sabine presbyterum cardinalem dederimus partibus auditorem quia tamen nec curator dictus in termino sibi ad prosequendum appellationem eandem a supradicto capellano prefixo et postmodum aliquandiu expectatus et citatus pluries in audientia publica nec aliquis ydoneus responsalis pro dicto clerico coram eodem cardinali comparere curavit idem cardinalis dictam diffinitivam sententiam diligenter inspiciens eamque per instrumenta et acta iudicii plene examinans quia eam invenit rite prolatam de iuris peritorum consilio prefato rectore presente pronuntiavit pro parte ipsius clerici male appellatum et a supradicto capellano bene pronunciatum fuisse appellationem huiusmodi decernens iniustam et sententialiter confirmans sententiam supradictam prout in patentibus litteris tam super diffinitiva eadem quam super huiusmodi pronuntiatione cardinalis prefati confectis ac sigillis capellani et cardinalis ipsorum signatis plenius continetur Nos itaque prefati rectoris supplicationibus inclinati diffinitivam et pronunciacionem easdem provide latas ratas et firmas habentes eas per nostras litteras duximus confirmandas Quocirca mandamus quatinus sententiam et pronunciationem easdem per te vel per alium executioni debite auctoritate nostra demandes Non obstante si aliquibus a sede apostolica sit indultum quod suspendi vel interdici aut excommunicari non possint sive aliqua indulgentia sedis eiusdem per quam huiusmodi executio impediri valeat vel differri et de qua seu cuius toto tenore oporteat in nostris litteris fieri mentionem Contradictores [] Dat Viterbii VII id febr anno quarto