Charter Document - 04050234

In deme namen des vatters vnd dez suns vnd dez heiligen geistes Ich Antonie von Rapreswilere kunden allen den die disen brief sehent daz mir min herre abt Anshelm von den Einsidelen mit siner bruoder willen vnde rate verlihen hat den zehenden den sin gotzhus hat in der parrochie ze Meylan vnd ich dauon antwurten sol XXV mut kernen vnde XV malter habern ze Pfeffikon uf dem huse vnd daz jerlich gewert sol sin an sante Martins mess Hic vmb gap ich mime herren dem abte vnd dem gotzhus von den Einsidelen XL marche ze erschatzze Swenne aber ich verfar so sol der zehende vnd daz silber dem gotzhus lidig sin gewunne aber ich erben bi der e die suln den selben zehenden mit dem selben gedinge han als ich in empfangen han Wil aber min herre der abt oder sin gotzhus den zehenden wider gewinnen so suln si mir oder minen liperben die XL mark wider geben vnd suln wir den zehenden ane alle rede wider lassen Vnd daz dis stete belibe darumbe han ich geben minen briefe mit mines herren ingesigel von Rapreswile grafe Ruodolfes Dis geschach ze eme wingarten do es drizehenthalb hundert jar was vnd darzuo in dem andern jar von gotz geburte an dem achtoden tag vor vnser frowen liechtmes Hie an waren die gezuge die hie geschriben stant graue Ruodolf von Rapreswil mit dez rate dis beschach vnd lutpriester Ruo von Vster der luppriester Wernher von Oberkilch der luppriester Heinrich von Hedistetten herre Ruo der phafe von Chenbetun abe deme Turne vnde herre Heinrich von Ebenoete rittere der meyer Berchtolt von Kaltebrunnen meister Herman Bruchi Peter usser der Owe Cuonrat von Hunbrechtikon meister Otto der koch Heinrich Roneman vnd andere gnuoge