Charter Document - 04050225

[] Eberardo de Sulze archidiacono Argentinensi Adeo probata devotio dilecti filii [] abbatis monasterii sancti Galli claruisse dinoscitur ut non solum speciali caritatis prerogativa diligentes eundem paterne affectionis dulcedine proponimus ipsum prosequi verum etiam ad suos dilectionem quam habemus ad eum extendere cupimus per effectum Sane dilectum filium Albertum prepositum ipsius monasterii consobrinum dicti abbatis honorare volentes et prosequi munere gratie specialis mandamus quatinus ipso abbate cedente regimine dicti monasterii vel etiam decedente prefatum A in continenti auctoritate nostra per te vel per alium preficias eidem monasterio in abbatem non obstantibus quod nulla super hoc inhibitio vel monitio ad prefati monasterii conventum emanavit vel si eis est ab apostolica sede indultum vel contingat in posterum indulgeri quod non obstante provisione vel inhibitione quacumque salva ipsis esse debeat eligendi potestas seu quod per litteras nostras sive legatorum nostrorum nullum in abbatem inviti recipere teneantur sive aliqua indulgentia si qua est aliquibus ab eadem sede concessa quod sine ipsorum consilio et assensu ipsi monasterio provideri non debeat de abbate aut si generaliter vel specialiter scriptum sit pro consimili gratia in monasterio predicto pro aliis quibus eum quoad huiusmodi gratiam preferri volumus in monasterio memorato sive quocumque statuto eiusdem monasterii iuramento vel alia firmitate vallato et quibuscumque indulgentiis quibuscumque personis vel locis ab eadem sede concessis per quas huiusmodi provisio impediri valeat vel differri et de quibus et toto tenore ipsorum de verbo ad verbum in presentibus plenam et expressam oporteat fieri mentionem Contradictores [] Nos enim decernimus ex nunc irritum et inane siquid contra mandati nostri tenorem super provisione ipsius monasterii contigerit attemptari Dat Lugduni X kl mar anno VIII