Charter Document - 04050219
| Charter Number: | 04050219 |
|---|---|
| Cartulary Title: | Chartularium Sangallense III [St. Gallen] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1251 |
| Date type: | Internal, A.D., Calendar, Papal |
| Resource Link(s): |
Monasterium.net |
Charter:
Innocentius + episcopus servus servorum dei venerabilibus fratribus archiepiscopis et episcopis ac dilectis filiis abbatibus prioribus decanis archidiaconis prepositis archipresbyteris officialibus et universis ecclesiarum prelatis ad quos littere iste pervenerint salutem et apostolicam benedictionem Dilecti filii [] abbas Cistercii eiusque coabbates et conventus universi Cisterciensis ordinis suam ad nos querimoniam destinarunt quod licet eis a sede apostolica sit indultum ut a conventibus forensibus sint immunes nullique liceat in eos vel eorum monasteria seu confratres [inibi] commorantes excommunicationis suspensionis aut interdicti contra id quod ab origine ordinis observatum misse dinoscitur sententias promulgare que si promulgate f[u]e[rint] d[ecernentur] per huiusmodi indulgentiam irrite ac inanes vos tamen eorum quieti et libertatibus de quo miramur non modicum invidentes ac molientes infringere indulgentiam supradictam [in e]os contra indultum huiusmodi de facto predictas sententias promulgatis quos ut fatigatis laboribus et expensis interdum ad conventus forenses accedere quandoque sententiarum vestrarum executiones quocumque sint auctoritate prolate suscipere invit[os co]mpelleretis pro vestre arbitrio voluntatis quamquam ex generali quod suscepisse dicimini apostolice sedis mandato teneamini eosdem in suis libertatibus et privilegiis contra pravorum pressuras et molestias defensare Sicque fit ut indulgentia concessa eis causa solatii et quietis sit ipsis vobis contra ipsam quasi conspirantibus causa dispendii et laboris Cum igitur sicut in lege dicitur parum sit in civitate ius esse nisi qui illud tueatur existat dignumque ac conveniens videatur ut indulgentie ac privilegia que devotis et benemeritis indulgentur contra presumptorum audatiam ipsos cum expedit tueantur universitatem vestram rogamus monemus et hortamur attente per apostolica vobis scripta in virtute obedientie districte precipiendo mandantes quatinus privilegia indulgentias et libertates eisdem ab apostolica sede concessa ac eorum consuetudines racionabiles et antiquas firmas et illibatas eis de cetero pro apostolice sedis et nostra reverentia observantes ab eorum super premissis coactione ac molestia penitus quiescatis ita quod ipsi concessa eis valeant tranquillitate gaudere ac super hoc per sedem eandem non oporteat aliter provideri Dat Lugduni III kl februar pontificatus nostri anno octavo