Charter Document - 04050161
| Charter Number: | 04050161 |
|---|---|
| Cartulary Title: | Chartularium Sangallense III [St. Gallen] |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1246 |
| Date type: | Internal, A.D., Calendar |
| Resource Link(s): |
Monasterium.net |
Charter:
In nomine domini amen + Universis Christi fidelibus hanc paginam inspecturis Haeinricus de patientia dei Constantiensis episcopus imperpetuum Ut facta modernorum posteris plenius elucescant scripturarum solent indiciis eternari Presentes igitur noverint et futuri quod dum vir discretus Rvodolfus miles de Glateburch dictus cognomine Giel feminis religiosis in Christo dilectis magistre et conventui sororum in Magginovwe quarum ipse locator ibidem in possessionibus suis et fundator divinitus inspiratus exstitit principalis ius patronatus ecclesie parrochialis in Magginovwe pro salute anime sue suorumque parentum libere contulisset pleno iure perpetuo possidendum renuntians coram nobis omni iuri quod habuerat in eodem Nos quoniam opus pietatis agitur cum pauperibus subvenitur predictorum Rvodolfi militis et sororum precibus inclinati auctoritate ordinaria nobis a iure concessa de communi consilio nostri capituli et consensu dictam ecclesiam in Magginovwe cum iure patronatus a predicto Rvodolfo milite ipsis collato prefatis magistre et conventui liberaliter contulimus pleno iure perpetuo taliter rettinendam quod de proventibus eiusdem ecclesie idoneo sacerdoti portione honesta et debita deputata per quam possit confratribus decanie loci archidiacono et episcopo respondere eundem nobis nostrisque successoribus investiendum nomine perpetui vicarii representent et persone ibidem processu temporis divinis obsequiis mancipate reliquos fructus eiusdem ecclesie ex hac nostra concessione recipere valeant in usus suos sicut expedit convertendos Ut autem hec nostra donatio provide facta non possit alicuius cavillationis ingenio futuris temporibus irritari presens instrumentum exinde confectum magistre et conventui contulimus sepe dictis nostri nostrique capituli sigillorum nomine subscriptionis munimine roboratum Acta sunt hec in Constant[iensi] ecclesia maiori anno domini MCCXLVI indictione quarta III nonas augusti multis presentibus tam clericis quam laicis in domino feliciter amen