Charter Document - 04050075

Gregorius episcopus servus servorum dei dilecto filio Conrado abbati monasterii sancti Galli eiusque successoribus regulariter substituendis in perpetuum + Licet omnibus fidelibus debitores ex iniuncto nobis a deo apostolatus officio existamus illis tamen propensiori cura nos decet adesse et ecclesiis sibi commissis suam iustitiam conservare quos constat ad sedem apostolicam specialiter pertinere Hoc nimirum intuitu dilecte in domino fili C tuis petitionibus clementer annuimus et monasterium sancti Galli cui deo auctore presides ad exemplar bone memorie Johannis et Innocentii secundi predecessorum nostrorum Romanorum pontificum presentis scripti privilegio communimus statuentes ut quascumque possessiones quecum que bona idem monasterium impresentiarum iuste ac canonice possidet aut in futurum concessione pontificum largitione regum vel principum oblatione fidelium seu aliis iustis modis prestante domino poterit adipisci firma tibi tuisque successoribus et illibata permaneant adicientes etiam ut libertates quas per privilegia predecessorum nostrorum quondam Burchardus provisor ipsius loci a sede apostolica impetravit tibi tuisque successoribus inviolata serventur ut videlicet nulla ecclesiastica secularisve potestas seu cuiuslibet conditionis aut ordinis contra voluntatem abbatis et fratrum idem monasterium intrare presumat nec in quibuslibet titulis ecclesiis decimis patrimoniis seu quibuslibet possessionibus ad eundem locum venerabilem pertinentibus indebitas exactiones aut consuetudines imponere audeat nec quolibet argumenti ingenio in prefato monasterio divinum presumat officium interdicere sed potius sicut ab antiquo et usque ad hec tempora idem monasterium in sua libertate permansit ita sub apostolice sedis tuitione in perpetuum perseveret Sancimus preterea ut decime ac possessiones quas ad ipsum monasterium legitime revocari contigerit perpetuis ibidem temporibus inviolabiliter conserventur Decernimus ergo ut nulli omnino hominum liceat prefatum monasterium temere perturbare aut eius possessiones auferre vel ablatas retinere minuere seu quibuslibet vexationibus fatigare sed omnia integra conserventur eorum pro quorum gubernatione ac sustentatione concessa sunt usibus omnimodis profutura salva sedis apostolice auctoritate Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita nisi reatum suum congrua satisfactione correxerit potestatis honorisque sui careat dignitate reamque se divino iudicio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Iesu Christi aliena fiat atque in extremo examine districte subiaceat ultioni Cunctis autem eidem loco sua iura servantibus sit pax domini nostri Iesu Christi quatinus et hic fructum bone actionis percipiant et apud districtum iudicem premia eterne pacis inveniant Amen amen amen [R] Ego Gregorius catholice ecclesie episcopus subscripsi [BV] + Ego Jacobus Tusculanus episcopus subscripsi + Ego Jacobus Prenestinus electus subscripsi + Ego Thomas tituli sancte Sabine presbyter cardinalis subscripsi + Ego Johannes tituli sancte Praxedis presbyter cardinalis subscripsi + Ego Guifredus tituli sancti Marci presbyter cardinalis subscripsi + Ego Sigenbaldus tituli sancti Laurentii in Lucina presbyter cardinalis subscripsi + Ego Stephanus sancte Marie trans Tiberim tituli Calixti presbyter cardinalis subscripsi + Ego Rainerius sancte Marie in Cosmidin diaconus cardinalis subscripsi + Ego Romanus sancti Angeli diaconus cardinalis subscripsi + Ego Rainaldus sancti Eustachii diaconus cardinalis subscripsi + Ego Oto sancti Nicholai in Carcere Tulliano diaconus cardinalis subscripsi Dat Laterani per manum magistri Bartholomei sancte Romane ecclesie vicecancellarii III non maii indiction VII incarnationis dominice anno MCCXXXIIII pontificatus vero donni + Gregorii + pape VIIII anno octavo