Charter Document - 04050023

In nomine sancte et individue trinitatis amen + Ego Kvonradus dei gratia Constantiensis ecclesie episcopus huius nominis secundus Aliis omissis unam et precipuam penalitatem peccatis primorum parentum exigentibus cogitur sustinere humana fragilitas ut memoria tenaci minime valeat gaudere unde facta priorum ad noticiam futurorum nequaquam possunt pervenire Quod periculum antiquiores et prudentiores viri provide precaventes negotia que racionabiliter celebrata fuerint scriptis statuerunt perennari Innotescat igitur tam presentibus quam post futuris omnibus bone voluntatis hominibus qualiter quidam nobilis vir Eberhardus de Mittelo in pago Turgewo sito predium suum quod in eadem villa inconcusse possederat ad mensam fratrum maioris chori Constant[iensis] pro remedio anime sue et parentum suorum donatione legitima contradidit Qua donatione pro debito celebrata dicti fratres comiti Diethalmo seniori de Togginburck defensionem predicte terre concorditer commiserunt et servicium quod pro labore defensionis singulis annis omni remota exactione debebat consequi videlicet duos modios tritici et IIII modios avene Constantiensis mensure et quinque solidos denariorum eiusdem monete sibi statuerunt Decursis vero pluribus annis propter discordiam que inter ipsum comitem seniorem et Diethalmum filium eius emerserat pater filium de castris suis emancipavit et quod in tali negocio consequens est prediorum et feodorum porcionem filio contradidit Tandem sepe dictus iunior comes defensionem dicte terre in Mittelo dapiferis suis Diethalmo et Burchardo carnalibus fratribus de Heitenowe nomine feodi concessit Quam persecutionem et violentiam pretaxati fratres Constantienses sibi illatam videntes seniorem comitem ad quem defensio eiusdem terre pertinuit eo quod in defensione ipsorum negligens extiterat in causam traxerunt Quo viso senior comes nolens habere gewerram adversus filium suum commisse sibi defensioni coram fratribus abrenunciavit Quo facto iunior comes et supra memorati dapiferi sui prenominatos fratres pretaxate ecclesie in dicta terra magis ac magis molestare minime verebantur Postmodum litigio diucius agitato idem comes iunior fratribus iusticiam suam recognoscens ius quod sepe dicti fratres de Heitenowe in predicta terra videbantur habere de manibus eorum et benigne consentientibus exemit et in chorum Constantiensem veniens curam defensionis eiusdem terre non nomine feodi set nomine commisse defensionis de manu decani fratribus consentientibus publice suscepit sub tali pactionis forma ne preter servicium quod patri suo pro labore defensionis quondam statutum fuerat manum exactionis extenderet nec etiam commissam sibi defensionem decetero alienaret Ut autem que prescripta sunt in perpetua teneantur memoria nec perversorum possint attemptari calumpnia hanc cedulam fecimus conscribi et sigilli nostri robore confirmari Si quis inposterum hoc negotium tam racionabiliter terminatum in recidivam suscitet contentionem destruat examen hunc summi iudicis amen Acta sunt hec in choro Constantiensi anno dominice incarnationis MCCXXI anno decemnovenalis cycli VI indictione VIIII B littera annali C littera dominicali epactis XXV concurrentibus IIII secundo klas febr presidente sedi apostolice Honorio huius nominis III anno apostolatus eius VI imperante gloriosissimo Romanorum imperatore Friderico et rege Sicilie anno regni eius VIIII imperii vero primo gubernantibus nobis Constantiensem kathedram anno electionis nostre XIII consecrationis vero duodecimo Testes autem qui hec audierant et viderant sunt hii venerabilis Diethericus abbas Crucelinensis Heinricus Constantiensis ecclesie maioris prepositus et regalis aule prothonotarius Werneherus decanus Waltherus de Roetinleim Ovlricus custos Rvodegerus de Raetirshouin Ovlricus Episcopaliscelle prepositus Heinricus camerarius Heinricus de Domo Livtholdus de Roetinleim Heinricus de Raprehswilaer Hilteboldus de Shinvm Burchardus de Kastello Heinricus filius Liuthfridi Heinricus Figulus et Oeteno Constantienses canonici ministeriales autem Rvodolfus de Arbona Wezelo dapifer Kvonradus pincerna Werneherus de Shoeninberck Kvonradus marscalcus et Baldebrehtus filius eius Bertholdus de Annewilaer et Diethalmus et Burchardus fratres carnales de Heitenovwe burgenses vero Marcwardus causidicus Hugo de Pivnde Livtfridus Waltherus de sancto Gallo et Ovlricus frater eius Ovlricus de Shoffe et Chvonradus frater eius et alii quam plures venerabiles viri tam clerici quam laici In domino feliciter amen