Charter Document - 04040271

In gotes namen amen Ich Hainrich der ritter von Schoeninstain kunde allen den die dise gegenwrtigen hantvesti iemer ane gesehint alde hoerrint lesin aine gelovbsami aller der dinge so dar ane geschriben stat Ir sulent allesamint fur aine rehtun warheit wissen daz ich vergihe mit dierre hantuesti daz ich die burch ze der Niwen Rauinspurch die mir min herre abbet Will[hel]m von sante Gallin in gvoten vnde in ganzen vnde in iemer werden triwen bevolhin hat die selben burch von ime enphangen han mit dem gedinge daz ich ime die vorgenanten burch zallen citen hivte morne vnde zallen stunden vnde sinen nachkomen ob er inware mit eren antwrten sol an allin furzvg vnde ane wider rede noch en sol ime noch sinen nachkomen weder en phandes wis noch mit dekainen anderen listen si vor behaben mit niwete Vnde daz ich minem herren abbet Will[hel]m vnde sinen nachkomen allez daz daz an dierre hantvesti stat staete han des gib ich ime zainer sicherhait minen oehaimen hern Rudolfen vnde Gerien von Willer mit mir vnverschaidenlichen ze troestern vnde ze wern ime vnde sinen nachkomen dise burch wider ze antwrtinne zallen citen alse da vorgeschriben stat Vnde ich herre H von Schoeninstain vnde wir herre Rud vnde Gerie von Willer sezzin vns ze wern vnde ze troestern vnserme hern abbet Will[hel]m alliz daz daz an dierre hantuesti geschriben stat mit gvoten triwen ze laistenne zallen citen ane alle gevarde vnde sweren dez ze den hailigon alle drie vnuirschaidenliche vnde geben ime dar zvo zainimer ewigen vrkunde dise hantvesti besigelt mit vnser aellir drier isigel Diz beschach ze sante Gallin do man zalte von gotez geburte MCCLXXXXIIII jare an dem nahesten vritage vor sante Gallin tult indict VIII Da ze gegene waren dise gezivge graue Rud graue Hug vnde graue H die gebrudere vnde graue Will[hel]m von Montfort herre H von Griezzenberc Egel von Rosenberc vnde herre H vnde herre Burch de voegte von Wartinse vnde ander erbere livte genvoge