Charter Document - 04040263

In gotis namen amen Wir Rvomo von gotis gnadon der abbit von sante Gallen vnde allir der conuent des selbin gotteshuses kunden allen den die disen brief lesint alde hoerint dierre dinge die hie nach gescriben stant aine warhait Wan bedarf wol daz man div dinch mit brieven vnde mit gezivgen staetecliche wernde mache div staete vnde ewekait ane alle wider rede haben sont Da von so tvon wir kunt allen den die nv sint aide her nach geborn sont werdin daz wir mit gemainime rate dem man ze susgetanen dingen nach gewonhait alde nach rehte haben sol vmbetwngenliche mit vrien willen wan wir daz bewnden han mit ainwelligime rate daz es in manege wis vns vnde vnsirme gotteshuse vnde ovch vnsiren nach komen bezzir getan ist danne vermitten hern Volriche von Rameswag vnsirs gotteshuses dienistmanne der vnsirme gotteshuse dike nuzliche het gedienet vnde noch gedienen mach vnde allen sinen liberben die nv sint alde her nach von ime geborn werdint die burch ze Blatton alse div rinchmure vmbevangen hat den hof ze Waltkiliche mit livten mit gvote mit kilichen sazze vnde mit allime deme rehte so dar zvo hoerit lihen vnde haben gelihen ze rehtime burchlehine ledecliche vnde laere hinnan wr ze besizzinne ane alle anesprache vnde ane alle wider rede mit allen den worten vnde den gebaerden die man bedarf ze susgetanen lehin nach rehte alde nach gewonhait Vnde sont siv die selben burch ze Blatton bewarn vnde behveten alse burger von rehte sont Vnde sol ovch div selbe burch deme gotteshuse vnde deme abbite von sante Gallen offen sin ze allen den noeten so siv ir bedurfen in allim deme rehte so ain burger von sinime burchlehene ze rehte tvon sol Doch so nemen wir vs alle die livte die in deme cile do wir deme vorgenanten hern Volriche von Rameswag die burch ze Blatton den hof ze Waltkiliche vnde der kilichen saz lihen ze rehteme burchlehine die do in vnseren vestinon mit huse sezhaft waren daz ist [] dir Schafriter vnde [] dir Swab vnde sin mvotir vnde Volrich Dingolf vbir die hat herre Volrich von Rameswag vns vnde vnsirme gotteshus gegebin sin mayrampt Dar zvo so binden wir vns vnde vnsir nach komin mit gemainime rate vnde vnsir gotteshus ewecliche es si ain Roemescher kaysir alde Roemescher kunich odir niht daz wir deme vorgenanten hern Volriche von Ramiswag vnde sinen liberbon an der vogetaye des vorgenanten hofes ze Waltkiliche odir an der kilichensazze odir an dekainen dingen div dar zvo hoerint mit nivte sont ierren an gerihte noch ane gerihte wir noch nieman von vnsirn wegen mit worten noch mit werken noch mit dekainir slahte dingen Wir vnde vnsir conuent allir gemainliche virgeben ovch deme vorgenanten hern Volriche von Rameswag wr vns vnde wr alle vnsir nach komen vnde wr vnsir gotteshus lutirliche allen den schaden swie er genemmit ist den er vns alde vnsirme gotteshuse ie getet vnde uirzihen vns allir der anesprache gen deme dike genemiten hern Volriche von Rameswag die wir gen ime hettont des tages do disiv schidunge ze Rorschach beschach Ich Volrich von Rameswag virzihe mich ovch allir der anesprache allir der brieve allir der hantvesten vnde allir der sichirhait swie siv namen hant gen deme gotteshuse vnde deme conuent vnde deme abbite von sante Gallen Daz abir diz daz da vor gescriben ist von vns vnde von allen vnseren nach komen ewecliche staete belibe so enzihen wir vns wr vns vnde wr vnsir nach komin vnde wr vnsir gotteshus allir der brieve die wir irworben han alde erwerben moehten von babiste von kaysirn alde von kunegen alde von dekainir slahte gerihte gaistlicheme alde weltlicheme mit deme daz dc da vor gescriben ist bekrenchit mohte werden alde widertan allir gesezzede allir hilfe gaistliches alde weltliches rehtis alde gewonhait vnde allim deme rehte vnde schirme vnde ovch allir der hilfe mit deme wir alde vnsir nach komen in kainir slahte wis daz daz da vor gescriben ist vnde gesprochen moehte verierrit werdin alde bekrenkit alde ovch sine craft verlieren Unde ze ainir eweclicher vrkunde allir der worte die da vor gesprochen sint vnde ovch der getat div da vor beschehen ist eweclicher staetekait so henken wir mit gemainime rate vnde mit vrilichime willen wir dir abbit Rvomo von sante Gallen vnde vnsir conuent vnseriv isigil an dise hantveste Diz geschach ze Rorschach vf der burch an dim naehisten sunnuntage vor sante Laurencien tult do von gottes geburte waren tusench iare vnde zwaihundirt jare vnde siben vnde sibinzich iare in deme sibenden iare da ze gegene waren her Albreht der von gottes gna[din] abbit ist ze Owe her Herman von Landinberc dir phaffe herre Walther von Kilichaim der da korherre ist in der stat ze Costinze ze sante Stephane herre Rudolf von Guttingen herre Rudolf dir Giel herre Volrich dir Giel herre Rudolf vnde dir herre Egelolf die gebrudir von Rorschach herre Egelolf von Altsteten her Herman der eltir von Landinberc herre Rudolf von Sulzberch herre Rudolf vnde dir herre Willehelm die gebrudir von Stainach herre Hainrich vnde dir herre Burchart die gebrudir de voegete von Rineke herre Rudolf von Lindinberc herre Wernher von Schinon die rittere vnde ander erbaere vnde bederber livte genvoge In deme namen vnsirs herren amen