Charter Document - 04040262

Allen den die dizen brieue lesint oder hoerrint lesin kund ich her Egl der alte von Rosinberg dc mir min lieber herre von gottis ginadin abte Wilh von sante Gallin het virsecit ze aenim phant den houe ze Gozowe mit lut vnde mit gut mit allem dem so darzu hoert an den kilchinsazz vnde an du phendir du dauor vs dem houe wurdin virsecit vnde och an der herrin phruont ze sante Gallin des closters Och het er mir virsecit alle die sunderlut die in dc ampt ze Gozowe hoerrint vmbe vunfcig march silbers vnde sehs phunt phening Vnde dabi so viriih ich offinlich an dizem brieue dc ich im gelopt han vur mich vnde alle min erbin dc ich im du selbin phendir widergeb an allin vurcug vnde an allin krieg swen ich oder min erbin von im oder sinen nahkomin werdin gewert des vorgenamptin silbers Dc aber diz war si do gab ich dem vorgenamptin minem herrun dem abte Wilh vnde dem gotzhuse ze sante Gallin dizen brieue bisigiltin mit minem ingisigil Dirre brieue wart gigebin do von gottis giburt warint zweihundert vnde nun vnde nuncig iar ze sante Gallin der cehindin kal des mercin ind der XII