Charter Document - 04040253

Nos Adolfus dei gratia Romanorum rex semper augustus recognoscimus et presentibus profitemur quod venerabili Wilhelmo de genere comitum de Monte Forti abbati monasterii sancti Galli Constanciensis dyocesis et in persona sua eidem monasterio in trecentis marcis argenti sumus nostro et imperii nomine ex causis infrascriptis debitores et legitime obligati Nam cum nobili viro Heinrico de Ffrouwemberg fideli nostro dilecto propter grata sua servicia presencia et futura ad que facienda idem se nobis et imperio obligavit centum et quinquaginta marcas argenti cumque ex eadem causa strennuo viro Gerwico dicto Gussen de Gussemberg fideli nostro dilecto quinquaginta marcas argenti pro uno dextrario comparando promiserimus nos daturos nos dictis Heinrico et Gerwico prefatum abbatem principem nostrum dilectum pro summa pecunie supradicte ad ducentas marcas ascendente delegavimus debitorem et constituimus solutorem accedente eorundem hinc et inde unanimi voluntate Sic igitur ex hac causa in ducentis marcis tenemur abbati et suo monasterio memoratis Preterea cum idem abbas nobis duos dextrarios et quadam arma pro centum marcis argenti vendiderit trecente marce argenti in summa resultant in quibus dicto abbati et suo monasterio nostro et imperii nomine dinoscimur obligati pro qua quidem pecunia eidem abbati et suo monasterio iudicium et ius advocaticium antiqum nobis et imperio quo ad ipsum monasterium et civitatem sancti Galli necnon quo ad opida in Wangen et Altsteten homines res bona et possessiones ipsius monasterii in quolibet suo territorio et districtu pertinens cum reditibus et obvencionibus universis ad idem iudicium et ius advocaticium ab olim spectantibus et annexis eisdem pignori obligavimus proventibus eorundem quos dicto abbati et suo monasterio donamus in sortem minime computandis tamdiu tenendum et titulo pignoris pacifice possidendum quousque dicte trecente marce argenti dicto abbati vel suis successoribus et ipsi monasterio plenarie fuerint persolute Verumtamen quia quosdam certos redditus dicti iudicii et iuris advocaticii strennuo viro Walthero villico de Altsteten pro quadam summa pecunie dicimur obligasse promisimus nos facturos quod dictus Waltherus villicus renunciabit et cedet obligacioni huiusmodi sibi facte quod si non fecerimus et ipsum abbatem data pecunia cessionem huiusmodi contigerit ordinare eam pecuniam quam idem ob causam huiusmodi dederit premissis trecentis marcis argenti ipsi abbati ut premittitur debitis sub omnibus pactis et condicionibus obligacionis pignoraticie supradicte volumus cumulari adici et annecti Ceterum dicto abbati et suis successoribus durante obligacione pignoris supradicti damus auctoritatem et liberam potestatem ponendi et statuendi iudicem qui presideat iudicio supradicto cui iudici taliter statuendo exnunc damus auctoritatem exercendi merum et mixtum imperium hoc est animadvertendi in facinorosos et mittendi in possessionem ac alia exercendi que ad huiusmodi spectant iurisdictionem et iudicium ab antiquo cum simplici cohercione sicut huiusmodi auctoritas a pro tempore presidentibus imperio per iudices huic iudicio presidentes consuevit exigi et concedi presencium testimonio litterarum nostre maiestatis sigilli secretorum robore munitarum Dat in castris apud Heppenhein anno domini millesimo ducentesimo nonagesimo octavo indict undec[ima] II kl iulii regni vero nostri anno septimo