Charter Document - 04040250

Wir Rudolf von gotz genaden Roemscher kung alle zit ain merer des riches tund ze wissen vnd ze bekennen allen geloebigen des hailgen Roemschen richs das wir habent an gesehen die luterkait der vnuermaßgoten truw vnd och gar vil nutzbar vnd fruchtbar dienst vnd och die swaeren schaden die der fest man Volrich von Ramswag vnser lieber vnd getruwer in vnsern diensten vnuerdrossenlich gelitten hat Vnd wellent in darumb begaben mit den gaben vnser sunderbarer guttaet vnd habent willen im ze geben von vnser kungklichen miltikait zwaihundert mark silbers vmb die wir im vnd sinen elichen erben aelli gesatzti vogtrecht die wir habent in der vogtyg des munsters ze sant Gallen willen haben ze versetzen ze habenn vnd in pfands namen ze besitzzen als lang vntz im oder sinen vorgedachten erben die vorgenanten zwaihundert mark silbers von vns oder von vnsern nachkomen in dem Roemschen rich volkomenlich bezalt werdent Vnd diser begabung vnd och Verpfandung ze bezugnust so habent wir disen gegenwurtigen brief darumb gehaissen schriben vnd mit vnser maiestat insigel versichern Geben ze Esselingen an dem naechsten zinstag nach allerhailgen tag do man zalt von Cristus geburt zwelfhundert vnd achtzig jar darnach in dem sibenden jar vnd in dem funfzehenden jar vnsers riches