Charter Document - 04040242

Wir Cvonrat von gotes genadun abte des gozhuses ze sante Gallen tveien kunt allen die dise brieve ansehent oder hoerent lesen das wir die sazzunge enpfanzwise die herre Willehelmen vnser vorvar Cvonrat dem Kovfman von Wile an der mulstat ze Riggenbach vnd swas dar zu hoeret gesezzet vnd getan hat vmbe dri marke silbers vmbe sinen dienst den er im vnd dem gozhuses ze sante Gallen hat getan vnd noch tven sol staete habin vnd viriehen an disen brieven das das selbe mulstat vmb das vorgenamte silber sin rehtes pfant si vnd es vrilich han sul als en rehtes pfant vnz das der vorgenamte Cvonrat volleclich von vns oder von vnserm gozhuse der dri marke gewert werde Dar ubir ze ainem offen vrkunde vnd ze ainer vestenunge gebin wir dem vorgenamten Cvonrat disen brief gevestenot mit vnserm insigel Dirre brief wart gegebin vor dem gesesse ze Iberc do man zalt von vnsers herren geburte tusent jar zwaihundert jar nivnzek jar an dem maentage nach dem sunnentag do man sanc Reminiscere