Charter Document - 04040204

In gotis namin amen Alle die disen brief sehint alde horint lesin die son dc wizzen dc ich her Diethrich der Meiger von Altstetin von dem zehinden so mir min herre abbit Wilh von sante Gallin hat gelihen zi rehtem erbe lehin sol gebin iargelich als vil zinses minem dem vorgenanten herrin vnde dem gotzhvs zi sante Gallin als vil ovch von dem selbin zehinden gabin der Keller von Altsten der Mvhsil vnde Rvodolf von dem Weidegaste vnde vergihe ovch an disem brieve vnde an allen stettin swenne min herre der vorgenant abbit Wilh ald dehein sin nahkomin ald dc gotzhvs zi sante Gallin mich ald ob ich enwere min erbin ermanet mit hvndert marken silbers Costenzer glotis so ist dc phant dc min herre abbit Wal selige von sante Gallin mir sazte vur sehzic marc vnde dc phant dc mir min herre abbit Wilh der vorgenande sazte vur vierzic marc vnde der vor genande zehinde dem gotzhvs zi sante Gallin ledig an alle geverde Dc diz war si vnde staete belibe dar vmbe so henkit her Hein von Griezzemberc vnde ich der vorgenant her Dietrich vnsiriv insigel an disen geginwurtigen brief Diz bischah in der stat zi sante Gallin nah vnsirs herrin gebvrte Iesv Christi tvsint iar zweihvndert iar in dem aht vnde ahzigostem iare an dem nehisten vritage vor dem balmtage