Charter Document - 04040088
| Charter Number: | 04040088 |
|---|---|
| Cartulary Title: | St. Gallen, Stiftsarchiv |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1250 |
| Date type: | Internal, Calendar, Papal |
| Resource Link(s): |
Monasterium.net |
Charter:
Innocentius episcopus servus servorum dei dilecto filio [] abbati monasterii Fabariensis Curiensis diocesis salutem et apostolicam benedictionem Cum sicut nobis dilecti filii [] abbatis sancti Galli ordinis sancti Benedicti Constantiensis diocesis devotio intimavit dudum monasterium Renaugense ordinis et diocesis eorundem sub certa forma bone memorie [] episcopo Constantiensi commiserimus gubernandum et tandem ipso episcopo sublato de medio illud sibi sub forma simili committentes eiusdem monasterii conventui duxerimus iniungendum ut ei tamquam suo prelato humiliter intendere ac obedire curarent iniuncto nichilominus [] abbati Heremitarum prefate diocesis ut eundem abbatem sancti Galli in ipsius monasterii possessionem induceret et tueretur inductum contradictores per censuram ecclesiasticam appellatione postposita compescendo idem abbas Heremitarum dictum abbatem sancti Galli in corporalem predicti monasterii possessionem huiusmodi mandati auctoritate induxit in contradictores excommunicationis sententiam proferendo Nos igitur ipsius abbatis sancti Galli devotis supplicationibus inclinati quod per eundem abbatem Heremitarum factum est in hac parte ratum et gratum habentes ac defectum si quis in huiusmodi processu est habitus supplentes de nostre plenitudine potestatis id auctoritate apostolica duximus confirmandum Quocirca discretioni tue per apostolica scripta mandamus quatinus prefatum abbatem sancti Galli non permittas super hiis contra suppletionis et confirmationis nostre tenorem ab aliquibus indebite molestari molestatores huiusmodi per censuram ecclesiasticam appellatione postposita compescendo Dat Lugduni III kl iunii pontificatus nostri anno septimo