Charter Document - 04040084
| Charter Number: | 04040084 |
|---|---|
| Cartulary Title: | St. Gallen, Stiftsarchiv |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1187 |
| Date type: | Internal, A.D. |
| Resource Link(s): |
Monasterium.net |
Charter:
Covnradus dei gratia Sabinensis episcopus Maguntine sedis archiepiscopus et apostolice sedis legatus cum universo eiusdem loci conventu dilectis suis fratribus Odalrico divina ordinante clementia cenobii sancti Galli venerando abbati sanctissimoque sibi subiecto conventui salutem cum fraterne dilectionis affectu Relatione antiquissimorum fratrum nostrorum percepimus hanc consuetudinem inter fratres sancte Maguntine ecclesie ac inter cenobitas sancti Galli hactenus extitisse quatenus perpetue fraternitatis vinculo coniuncti orationibus que tam pro vivis quam pro mortuis utrobique celebrantur communicarent et si forte aliquem ex fratribus nostris pro aliqua honesta causa in predicto loco adesse contingeret plenarie unius fratris prebendam reciperet et eodem iure quilibet ex fratribus vestris ecclesiam nostram adiens similem caritatem inveniret Anno igitur ab incarnatione domini MCLXXXVIII presidente domino Vrbano summo et universali pontifice regnante gloriosissimo imperatore Friderico ego Covnradus Sabinensis episcopus Maguntine sedis archiepiscopus et apostolice sedis legatus veniens ad cenobium beati Galli confessoris orationis causa ad petitionem tam fratrum nostrorum quam fratrum sancti Galli presente amico et fratre nostro Heinrico nostri conventus venerabili decano necnon Ovdalrico Constantiensi preposito ac eiusdem loci Ovdalrico thesaurario plurimisque clericis nostris ac militibus presentiam suam adhibentibus predictam consuetudinem domino Ovdalrico abbate consensum prebente communi petitione fratrum renovavi et confirmavi sollempnique fraternitate a toto capitulo recepta et e converso Maguntino conventui per fratres nostros transmissa litteris hanc confirmationem inscripsi ac sigillo nostro quatenus deinceps firmitatem teneat insigniri decrevi